Sereka Weqfê Heqanê Merdiman ê Tirkîya (TÎHV) Prof. Dr. Sebnem Korur Fîncanci ya ke derheqê grevê vêşanîye û rojeyê mergî de qisey kerd ard ziwan ke her roje rewşe giranêr bena û rîskê weşîya çalakgeran girdêr beno.

Sebnem Korur Fîncanci ya ke derheqê  babeta grevê vêşanîye de ajansê ma rê qisey kerd nê vatî: ‘’Ma tena nê prosesi seyr kenê. Çîyêk destê ma ra nêno. Rewşa çalakgeran her roje hîna giranêr bena. Beno ke mergî bibî. Grevanê verênan de sey hekîmanê xoseran ma eşkayêne rewşa çalakgeran teqîp bikerê. La na rey wîna nîyo. Bi sebebo ke nêeşkenê vengê xo bidê eşnawitene bedenê xo dayê verê mergî.  Zaf dejo pîlo ke bê bedenê înan yewna îmkanê înan çîno ke vengê xo bidê eşnawitenê. Ganî ma ê ke teber de yê vengê înan hîna hol bieşnawitêne û bidayêne eşnawetene la ma kemî mendî. No tena tecrîdê Abdullah Ocalanî nêyo zîndanan de heme kesî binê tecrîdî de yê. Ma vengê înan nêda eşnawitene û ê bi bedenanê xo wazenê ke vengê xo bidê goştarîkerdene.’’

Fîncanci bale ante zextanê zîndanî û muhîmîya vîtamînê B1’î ser û wina dewam kerd: ‘’Heme heqê tepişteyan yenê binpaykardene. Çalakgerê ke grevê vêşanîye û rojeyê mergî de yê hetê şertanê weşîye ra tengayî ancenê. Mesela na çalaki sey sucî yena vînayene û  cezaya disîplînî dîyena tayî çalakgeran. Reyna çîyê esasî yê ke ganî çalakgerî bigêrê sey sole, şeker û karbonat û vîtamînê B1’î yo   ke ganî  çalakgerî  miheqeq bigêrê tayî zindanan de kêmî dîyenê. Yewe zî wina yew zanayîşo muhîm esto. Ê ke rojeyê mergî de yê vîtamînê B1’î cavêrdene, no zaf xelet o. Vanê ‘Ma hinî rojeyê mergî de yê û çîyê ke vernîya mergî gênê ma cavêrdene’. Vîtamînê B1’î vernîya mergî nê vernîya seqetîye geno. Nê merdimi xora nêwazenê bimirê. Na çalakîya xokiştişe nêya. Wazenê vengê xo bidê eşnawitene. Vilaweka Yewîya Tabîban a aktuel de na babete zaf eşkera ya: Ê ke rojeyê mergî û grevê vêşanîye de ganî vîtamînê B1’î bigêrê.’’

Prof.Dr. Sebnem Korur Fîncanci seba ke rolê xo bica bîyarê veng da muxalîfan û qiseykerdişê xo wina qedîna: ‘’Tîya  wezîfeyo muhîm ma de yo. Muxalîfî ganî vengê xo berz bikerê û semedê vengê zîndanan û merdimanê tepişteyan biderê eşnawitenê têbigêrê. Ma nêeşkenê wina vinderê û îredeyo sîyasî ra bipawê ke ê game bierzê. Ma sey muxalîfan eşkenê zor bidê îradeyê sîyasîyî. Eke ma vengê xo mevejê xeymê înan de nîyo. Wezîfeyê muxalefetî heqîqatî vejo werte û seba ke game bierzo şiro îradeyê sîyasîyî ser.’’