Avûkat Franco Danieliyo ke hetkarê Wezîrê Karanê Teberî yê Îtalya yo verên o ajansê ma rê derheqê rewşa Rayberê Şarê Kurdî Abdullah Ocalanî de qisey kerd.

Franco Danieliyî ard ziwan ke seba ke hukmatê dewrî yê Îtalya bêcesaret bi Abdullah Ocalan Îtalya ra vejîya û vat,  ''O wext heme dewletan her çîya ver waşt tekîlîya ekonomîkî ya menfeatî ya mabênê xo û Tirkîya bipawo. Mesele o wext tekîlîya Almanya, Fransa û Îtalya bi Tirkîya holbî. Heme welatan semedê menfeatê xo nêverda Ocalan Ewropa de ca bido xo.

Ocalanî semedê çareserkerdişê meseleya kurdan firsetê muhîmî teqdîm kerdî. Ocalanî zîndan de kitabê muhîmî nuştî û têna semedê Kurdîstan û Tirkîya nê eynî wextî de babetê ke demokrasîyê heme dinya aver bena girewtî dest. Ocalan wazeno û eşkeno na mesele çareser bikero la muxatabê ci çîn o. Tirkîya vengdayîşanê ey goştarî nêkena. Xora qerarê PKKyî yê Yewîya Ewropa zî verê çareserkerdişê meseleya kurdan de asteng o.

Şertê tecrîdî yê Îmraliyî hetê xeylêk hetan ra ameyî şermezarkerdene. Şertê zîndanî ke Ocalan tede yo nînê qebulkerdene.  Nê şertî heme heqanê merdiman û pêkerdişanê mîyanneteweyî binpay kenê. Sey wextê tepiştişê Ocalanî welatê Yewîya Ewropa û NATOyî semedê menfeatê xo nê wazenê tekîlîya xo bi Tirkîya bixeripnê. Coka vera na rewşe bêveng manenê. Nê semedî ra ganî şarî û têgêrayîşê komelê sîvîlî vera tecrîdê serê Ocalanî vengê xo berz bikerê. Kam ke azadîya şaran wazeno, heme komelî ganî semedê azadîya Ocalanî bibê seferber.''