Wezîrê Karanê Teberî yê Fransa Jean-Yves Le Drîanî da zanayene ke seba muhakemekerdişê DAÎŞ’ijanê xerîban ê ke destê Hêzanê Sûrîyeya Demokratîke (QSD) de ye, "mekanîzmayêka muhakemekerdişî ya mîyanneteweyî” yena etudkerdene.
Le Drîanî rojnameyê Le Parîsîenî rê qisey kerd û vat, “Ma seba awankerdişê mekanîzmayêka huqûqî ya taybete etudan kenê.”
Goreyê Wezîrê Karanê Teberî, na mekanîzma beno ke sey mekanîzmayanê mîyanneteweyî yê Kosova û qitaya Afrîka bêra amadekerdene.
Rayberîya xoser a Vakurê û Rojakewtena Sûrîye pêşnîyaz kerdîbî, ke seba muhakemekerdişê çeteyanê ke herême de yê mehkemeya mîyanneteweyîye bêra awankerdene.
