Bajaranê Toulouse û Marsîlya yê Fransa û paytextê Norveçî Oslo de tecrîdo ke Rayberê Şarê Kurdî Abdullah Ocalanî ser o esto, ame protesto kerdene. Çalakvanan bêvengîya Ewropa rê hêrsê xo arde ziwan û waşt ke wa seba wedaritişê tecrîdî têbigêrî.
TOULOUSE
Bajarê Toulouse yê Fransa de vera tecrîdî de bi seyan kurdîstanijî û dostê ci vejîyayî kuçeyan. Çalakvanan bi rayîrraşîyayîşêk eleqe ant tecrîdê Îmrali ser. Dima zî mîtîngêk ameye viraştene. Qiseykerdişan de komploya mîyanneteweyî dîya vîr û hêrişanê dewleta tirkî yê vera kurdan rê bêvengîya welatanê Ewropa ame şermizar kerdene.
Îdarekarê Sud éducation31 (Sendîkaya Perwerdeyî ya Başûrî) zî tewrê mîtîngî bîyî û dîyar kerdî ke ê tim paştî danê têkoşînê şarê kurdî.
MARSÎLYA
Îstasyonê Marsîlya de zî rayberîya gencanê kurdan de xeylê kesî ameyî têhet û tecrîd şermezar kerd. Çalakvanan vist vîr ke 2016î ra nata Ocalanî ra xebere nîna girewtene û wina va: “Peroyê muracatê dîyayîşî yê keye û avûkatanê Ocalanî yenê red kerdene. Ma sey Ciwanên Azad heta azadîya Ocalanî, her cayê Ewropa de çalakîyan virazenê û wayîrê rayberê xo vejîyenê.”
OSLO
Paytextê Norveçî Oslo de zî kurdîstanijan rayberîya KCDK- E de bi çalakîyêk tecrîdê Îmrali pretesto kerd.
Verê parlamento de xeylê kesî ameyî pêser, tecrîd protesto kerd û vera polîtîkaya hêrişkare ya Erdoganî de waşt ke wa welatê Ewropa bêveng memanî.
Kurdîstanijî do her roja îne merkezê Oslo de derheqê tecrîdî de vilawekan vila bikerî.
