Grevê vêşanîye yê vera tecrîd û binpaykerdişanê heqanê tepişteyan dewam keno. Endama TUHAY-DERî ya Herêma Marmarayî Yuksele Gozde derheqê mesele de ANfyî rê qisey kerd. 

Gozde îfade kerd ke ganî komel derheqê na babete de zêdêr hîsger bibo û bale ante prosesê grevî yê 210-2019î ser. Gozde vat: ''Seke ê çaxan nika zî weşîye tepişteyan ser o qesawet esto. Keyeyê tepişteyî tim binpaykerdişanê heqan û grevî ser o muracatê ma kenê. Prosesê grevê 2019î de rayaumûmîye hîsgerîyêka pîle mojnabî. La nika komel bêveng o. Îmrali de tecrîdêko giran esto û no tecrîd pêro zîndanan rê vila bîyo. Merdimî çira bedenê xo vêşan verdenê? Cewabê na perse cewabê pratîkê dewlete yo.''

Gozde da zanayene ke îqtîdarê AKP-MHPyî mîyanê komelî de ters afernayo û vila kerdo. Gozde vat: ''Ganî ma bi çêrî têbigêrê û nê tersî werte ra wedarnê. Nê tepişteyî senî eşkenê vengê xo bidê eşnawitene? Na meseleyêka cidî ya. Ganî ma wayîrê înan vejîyê nêbo mesele do biba pîlêr. Tepişteyî hema zî nêeşkenê pêvînayîşî bikerê. Tepişteyê nêweşî nênê dermankerdene. Hema zî tepişteyî aşî nêbîyê. Keyeyê ke pê rewşe qerqilîyenê muracatê Wezaretê Edaletî kenê.''

Gozde peynîya qiseykerdişê xo de wina vat: ''Wezaretê Edaletî soz dabi. Ma zî tîya ra venga ci danê ke wa mesuldarîya xo bîyaro ca. Ganî rêxistinê komelkî, roşnvîr û dezgehê sivîlî zî derheqê babete de têbigêrê. Wa her kes vengê tepişteyan bido eşnawitene.''