33 ciwanê Federasyonê Komeleyanê Ciwananê Sosyalîstan 20ê temmuza 2015î de Merkezê Komelî yê Amara yê Pirsûsî yê Riha de hêrişê DAÎŞî de ameybî qetilkerdene.

Hêrişker Abdurrahman Alagoz û birayê ci Yunus Emre Alagoz seba ke 'terorî ra gêrîyayeno înan' qeydê înan est bi û hêrişî ra ver babîyê înan gerreyê lajanê xo kerdbi. Qirkerdişê Pirsûsî ra dima Yunus Emre Alagoz Garê Anqara de zî qirkerdişêk kerd.

Derheqê dewaya Qirkerdişê Pirsûsî de Avûkata Buroyê Huqûqî yê Bindestan Sezîne Uçar ANFyî rê qisey kerd.

Sezîne Uçar pare kerd ke înan zanayêne ke dezgehê hukmî do nêeşkê edaletî bîyarê coka înan seba xetêka komelkîye xîret kerd. Uçare vat: ''Ma Platformê Seba Pirsûsî Edalet awan kerd. Ma Qirkerdişê Sêwas, Roboskî û Beyazitî ra zî zanenê ke heta ke têkoşînê edaletî yo komelkî nêbo edalet nêno caardene. Platformê ma zaneno ke Qirkerdişê Pirsûsî hetê kesêkî ra nêameyo kerdene. Ma zanayêne ke selahîyetdarê dewlete û cergê DAÎŞî de zî mîyanê nê qirkerdişî de yê. Wextê cigêrayîşê serebûtî de ma kamyew delîl arê da pêşkêş kerd. La dozgerî 18-19 mengan îdîaname amade nêkerd. Seba waştişanê ma û cigêrayîşan çîyêk nêkerd.

Ma zaf reyî şîyî Riha, dozgerî de roniştî. Ma waşt ke têkilîyê Abdurahman Alagozî wa bêrê cigêrayene la no qebul nêbi. Pirsûsî ra dima Yunus Emre Alagozî Anqara de qirkerdiş kerd. Eke Qirkerdişê Pirsûsî ser o bi raştî biameyêne vindertene Qirkerdişê Anqara do nêameyêne kerdene. Derheqê Qirkerdişê Pirsûsî de têna vera hîrê kesan Yakûb Şahîn, Denîz Buyukçelebî û Îlhamî Balîyî îdîaname ame amadekerdene. La no qirkerdiş 3-4 kesan ra nêno pê. Ma waştbi ke kamî ke hetkarî û amadekarîya nê qirkerdişî kerda wa bêro tepiştene û muhakemekerdene.''

Uçare pare kerd ke heyetê diyînî yê mehkeme qebul kerd ke Îlhamî Balî û Denîz Buyukçelebî ser o cigêrayîş bêro kerdene. Îstîxbaratî seba dosya dîyar kerd ke Balî Îdlîb de binê kontrolê Tirkîya de yo û Buyukelçî zî Şam de yo. Eşkera bi ke Balî Nêweşxaneyê Dewlete yê Cîhanbeylî yê Konya de tedawî bîyêne. Qaşo dewlete cigêrayêne ci la o nêweşxaneyêkê dewlete de bibi.''

Uçare waşt ke wa Serekwezîrê ê çaxî Ahmet Davutoglu dewa de sey şahîdî qisey bikero. Uçare vat: ''Davutoglu têna şahîd nîyo, raştê raşt kiştoxê nê qirkerdişî yo û sûcdar o. Wa Davutoglu tewrê dewa bibo û çi zaneno mehkeme de vajo. Mehkeme waştişê ma ne  qebul kena ne zî red kena. Agahîya qirkerdişî şibî mudirîya asayîşî. Asayîşî qetî vera qirkerdişî tedbîr nêgirewto. 3 selahîyetdarê asayîşî sûcê 'wezîfeyê xo îhmal kerdo' ra ameyî muhakemekerdene û cezaya pereyan dîyaye înan.

Dewaya newîye menga kanûne de do bêra kerdnee. Pêro waştişê ma ameyî qebulkerdene. No zî netîceya têkoşînê 7 serran de bi.''