Wekîla HDPyî ya Adana Tulaye Hatîmogullari ANFyî rê qisey kerd û dîyar kerd ke bêkarî, vêşanîye û xizanîye zêdîyayî.

Tulaye Hatîmogullari da zanayene ke rîyo raştikên ê AKPyî  7ê hezîrana 2015î de û prosesê mabênê 7ê hezîrane û 1ê teşrîna peyêne de  vejîyayo werte û vat: ''Serêkanîyê de kişîyayîşê polîsan ra dima masaya prosesê haştîye ame rijnayene. Dima vejîya werte ke no serebût provakasyonêk bi. Bi destê AKPyî prosesê darbeya leşkerîye ame amadekerdene. Ewro Tirkîya mîyanê xizanî, vêşanî û bêkarîye de ciwîyena û vera pêro hemwelatîyan hêriş est o.

Îqtîdar seba ke serê krîz, bêkarî, talanî bigêro verê xo dano hêrişê kurdan. Îqtîdar bi operasyonanê tebersînorî atmosferê 'Ma vera terorî têkoşîn kenê' awan keno. Têna HDP muxalefet nîyo. Erkê muaxalefetî no yo ke ganî teşhîr bikero ke hêrişê 'tebersînorî' bi kamyew armancî yenê kerdene. Ganî muxalefet bieşko vajo ke ê ney qebul nêkenê. Erdogan key teng bibo sey gezmaxeyê turîstîkî veera Rojawanî operasyon keno, qirkerdişî keno.  Sebebê ney zî ameyoxê welatî nê ameyoxê îqtîdarê AKPyî yo. Ganî muxalefet ney bi zelalî vajo.''

Wekîle Tulaye Hatîmogullari ard ziwan ke prosesê weçînayîşî dest pêkerdo û vat: ''Asayîşê weçînayîşî çin o. AKPyî dest na pêro dezgehanê dewlete ser. Îqtîdar wazeno HDPyî biqefilno. Hetê bînî ra koçberîye zêdîneno. No proseso ke Tirkîya tira derbaz bena, prosesêko tarî yo. Ma sey HDPyî bi sereyê xo eşkenê xeylêk çîyan bikerê la ganî muxalefet seba meseleyan çareserîye biaferno. Ma reyna eşkera kenê ke ma do têkoşîn bikerê. Seba ney ma xebatanê hemparan rê amade yê.''