Wekîla Partîya Têdûştîye û Demokrasîyî ya Şaran (HEDEP) û Endama Heyetê Îdareyî yê Partîya Azadîya Komelkîye (TOP) Perîhane Koca derheqê şerê Îsraîl-Hamasî, tewirê vera nê şerî û tewirê îqtîdarê AKP-MHPyî de ANFyî rê qisey kerd.

Perîhane Koca hêrişê Îsraîlî sey 'barbarîye' ercnayî û vat: ''Dinya kontrolî ra vejîyaya. Wexto ke faşîzm vila beno hêverî krîteranê merdimatîye binpay keno. Ganî ma tewirê klasîkî yê şermezarkerdişî û hêrsî war verdê. Dormeyê ma de şer est o. Beno ke Hîzbullah, Îran û Amerîka zî tewrê şerî bibê. Ganî vera ney ma bê şert û mercî paştî bidê têkoşînê şaranê bindestan. Ganî ma rayîr nêdê ke kolonyalîstî wayîrê têkoşînê şarî vejîyê. Dewaya Filîstînî tewr zaf dewaya çepgîran a.''

Perîhane Koca pare kerd ke îqtîdarê AKP-MHPyî rê filîstinîjî teyna sey hûmare û îstatîstîkî yê û îqtîdaro ke Rojawan û Sûrîye vurnayo gola gonîye a raşte rewşa Filîstînî zî xem nêkeno.

Perîhane Koca vat: ''Sextekarîyêka pîle est a. Ganî ma her ca de ney teşhîr bikerê. Îqtîdar nêeşkeno bi zelalî vera şîdetê Îsraîlî vejîyo. Çunke îqtîdar muhtacê pereyê Îsraîlî yo. Çîyê ke Filîstîn û Rojawan de qewimîyenê manenê pê. Îqtîdarê AKP-MHPyî sey Îsraîlî Rojawan de qirkerdiş keno.''