Buroyê Huqûqî yê Asrinî badê qerarê Komîteya Wezîran a Konseya Ewropa yê derheqê Îmralîyî eşkerayîye daye û nê pare kerdî:

''Qerarê 'heqê hêvî' yo ke Mehkemeya Heqanê Merdiman a Ewropa (MHME)18ê adare ya 2014î derheqê muwekîlê ma Birêz Ocalanî de girewtbi, Tirkîya nêard ca. Komîteya Wezîran a Konseya Ewropa binpaykerdişê nê qerarî girewt rojdemê xo netîceya ci eşkera kerde.

MHME qerarê xo de vat bi ke cezaya muebetê giranî heta peynî emirî hewce nêkeno bêro domnayene û waştbi ke wa şertê ceza bêrê bedilnayene. Rixmo ke xeylêk wext ravêrt zî komîte peynî de kombîyayîşê mabênê 30ê teşrîna peyêne û 2ê kanûne de dosya girewt rojdemê xo. Komîte netîceya kombîyayîşî eşkera kerd û waşt wa qerar cade bêro caardene. Tirkîya ganî çerçewa qanûnan de goreyê standaranê MHME têbigêro. Ganî Tirkîya cade qerarê MHME waştişê netîceya kombîyayîşê Komîteya Wezîran bîyarê ca. Ganî şertê muebetê giranî bêrê bedilnaye. Rejîmê înfazî yo ke bi Birêz Ocalanî ame destpêkerdene û ewro her cade sey îşkenceyî yeno caardene ganî bêro wedaritene.  Ma do semedê wedaritişê nê sîstemî pîya bi dezgehan huqûq û heqanê merdiman xebatanê xo bidomnê. Ma veng danê heme rayapêroye ke wa hîsgêr têbigêro û paştî bido.''