Tepişteyê Zîndanê Erziromî Emrah Yakutî 13ê temmuze de pêvînayîşê bi keyeyê xo de qala îşkence û gefê kiştişî yê gardîyanan kerde.

Dadîya Yakutî Sebîha Yakuta ke Wan de manena, dîyar kerd ke lajê aye vato ''Gardîyanî do mi bikişê.''

Dayîke Sebîha da zanayene ke wexto ke a şîyêne pêvînayîşî korîdorî ra heta oda 50 gardîyanî est bîyî û vat: ''Gardîyanan lajê mi erdî ra kaş kerd û ard zereyê oda. Mi lajê xo ra pers kerd ke se bîyo. Lajê mi zî vat ke gardîyanî do ey bikişê.''

Yakute îfade kerd ke bedenê lajê ci pirodayîş û şîdetî ra mor bîyo û vat: ''Mi gardîyanan ra waşt ke wa lajê mi rê awe bîyarê. Înan mîyanê tasêkî de awe arde la lajê mi nêeşka awe biwerê. Çunke nêeşka milê xo berz bikerê. Mi awe daye lajê xo. Lajê mi vat ke seba ke ey waştiş û tedayê gardîyanan qebul nêkerdê gardîyanan da piro. Gardîyanan derzîne daya lajê mi ro û dima hişê lajê mi şîyo.''