Gelo Dîyanetî hende pereyî se kerd?

Dîyaneto ke hetê rejîmê Erdoganî ra nizdîyê 6 mîlyar 800 mîlyon TL ci rê amebi aqitnayene bes nêdî û 111 mîlyon 988 hezar TL zî zêde xerc kerd.

Dîyaneto ke hem Tirkîya de û hem zî teberê Tirkîya de seba rejîmê faşîstî karê îdeolojîk û ajanîye keno, zaf pere xerc keno. Goreyê xebera rojnameyê Cumhurîyetî, Mehkemeya Muhasebatî derheqê butçeya Dîyanetî de cigêrayîşî kerdî û vera bêûsulîyê ke ameyî kerdene de cewabê Dîyanetî yê ‘do hewl bêro dayene’ bes dîyo.

Rejîmê Erdoganî her serre butçeya Dîyanetî hîna zêde keno. Dîyaneto ke sey artêşa îdeolojîkî kar keno, 2017 de 6 mîlyar 800 mîlyon TL pere xerc kerdbi. Labelê ame musayene ke Dîyanetî nê pereyî bes nêdîyo û xerckerdişê nimiteyî zî kerdî.

Dîyaneto ke se ra 1ê butçeya dewlete bikar ardo, bi mehneya ‘meaşanê îmaman rê pere qîm nêkerdo’ 111 mîlyon 988 hezar TL zî bi hawayo nimite xerc kerdo.

QASÊ 25 MÎLYAR TL BÊÛSULÎYE

Raporê Mehkemeya Muhasebatî de sernuşteyê ‘fealîyetê negatîfî’ bala merdimî anceno. Rapor de yeno vatene ke Dîyanetî 7 mîlyar 500 mîlyon TL xerc kerdo û pereyo ke dewlete ra ameyo girewtene zî sey ameyeyî nêhesibîyayo. Reyna rapor de seba serranê verênan 17 mîlyar 600 mîlyon TL, seba emserî zî 7 mîlyar TL pêro pîya nizdîyê 25 mîlyar TL pere sey zirarî ameyo nîşan dayene.