Gulîstane Doku 5ê çeleyî ra nata vînbîyaye ya. Netîceya xebetanê cigêrayîşî Gulîstane ra rêçêk nêame dîyene û tehqîqatê serdozgerîye zî aver nêşino. Wendekarê Zanîngehê Munzurî, dezgehê komelkî yê sivîlî hema zî persenê ke ''Gulîstane Doku kotî de ya?'' Dêrsimijî îfade kenê ke seba ke babîyê gumandarê yewînî Zainal Abarakovî polîs o serebût sey 'xokiştişî' yeno mojnayene. Hemwelatîyî eşkera kenê ke naye ra têna awbend de xebeta cigêrayîşî ameye kerdene û ê fikirîyenê ke Gulîstane Doku ameye kiştene. 

Îsa Buranî ard ziwan ke ekîpanê cigêrayîşî raporanê xo de da zanayene ke Gulîstane awbend de nîya la serdozgerîye bi israr îdîa kena ke Gulîstane awbend de ya. Buranî vat: ''Zainal hema zî bi hawayêkê bidetayî nêame perskerdene. Eke Gulîstane awe de bibîyêne heta nika ma a dîyêne. Ma hînî îhtîmalê cînayetî fikirîyenê.''

Gulbahare Tekçe zî venga şarê Dêrsimî da ke wa hîsger bibo û vat: ''Senî Gulîstane hema zî vînbîyaye ya? Ma na rewşe ra şik kenê. Beno ke a kişîyaye zî. ''

Ahmet Erolî vat: ''Wina ame mojnayene ke Gulîstane xo kişta. La ez naye ra bawer nêkena. Ma her roje persenê ke Gulîstane kotî de ya. Vanê 'ma gêrenê ci.' La têna ewnîyenê awbendî. Eke raşt a zî bigêrayêne ci nika rewî ra eşkera bibîyêne ke Gulîstane kotî de ya. Eke Gulîstane xo bikiştêne zî vejîyayêne werte. ''

Ezgî Karaman zî bale ante ser ke raştîya serebûtî yena mîyankerdene. Karamane vat: ''Dêrsim de rojanê peyênan de polîtîkayê cîyayî yenê kerdene. Cinîyî binê teda de yê. Ma sey cinîyan eşkenê na rewşe bivurnê. Ganî ma serebûtê Gulîstane zî, ê îstîsmar û tacîzan zî çareser bikerê.''