Namzeda Partîya Çep a Keske ya Îstanbulî ya herêma diyîne Ozgul Saki derheqê weçînayîşî de ajansê ma rê qisey kerd.

Ozgul Sakî 1967 qezaya Çaycuma ya Zonguldakî de ameya dinya. ODTU ra mezûn bîye û Îstanbul de mamosteyîye kerde. Tîya tewrê têkoşînê sendîkayan bîye û serranê 90yan de semedê ronayîşê komîsyonê cinîyan ê sendîkayan têkoşîn kerd. Mîyanê têgêrayîşanê femînîstan de ca girewt û xeylêk nuqtayan de Têgêrayîşê Azadîye reyde ameye têhet. Bitaybetî wextê xoverdayîşanê xoîdarekerdişî de sey leteyêkê Cehdkerdişê Cinîyan ê Semedê Haştîye şîye Kurdîstan. Tîya şahîdîye û çimdarîya xoîdarekerdişî kerd û şîye Mekîsa tecrubeyê xoîdarekerdişî ca de dîyî û dima ra prosesê haştîye yê Kolombîya rê şahîdîye kerde.

Sakiya ke xo sey  ‘sosyalîst femînîste’pênas kena derheqê muhîmîya meclîs de cagirewtişî de nê vatî: “Ma wazenê vengê xo yê kuçeyan bikirişê meclîsî û ûca ra zî  warê hîrayî rê bidê eşnawitene.Tîya yew mewzî, yew war o. Eynî wextî de tîya de vera serdestîya camêrdan zî çew eşkeno têkoşîn bikero. Îtîfaqê Cumhurî xora dişmenê cinîyan o. Goreyê xo cinîyan rê yew rolo sey cinîya makul fasilnayo, vanê wa cinîyî teberê nê mevejîyê. Cinîyê ke nê qebul nêkenê înan rê şîdetî meşrû hesibnenê. Ma do desturê nê medê. 

Seba ke no sîstem bêro bedilnayene, gerek rayêke zî zîyan mebo. Zaf muhîm o ke ma zafêr wekîlan bikirişê meclîsî. Xora her kes zano, gerek no sîstem bêro bedilnayene. Ma pêrone dî ke rejîmê yewmerdimî  ra netîceyê senî vahîmî vejîyayî. Coka gerek no  sîstem bêro bedilnayene. Semedê nê zî gerek qanûnî û Qanûnê Bingeyî bêro bedilnayene. Tîya de humara wekîlan zaf muhîm a. Gerek rayêke zî zîyan mebo û zafêr wekîlî bikirişîyê meclîsî.”