Wekîlê Partîya Demokratîke ya Şaran (HDP) yê Kocaelî Omer Faruk Gergerlîogluyo ke wekîlîya ci ameye wardayene vizêr keyeyê ci de pê derbkerdişê polîsan ame girewtene.

Badê destbendkerdişî rîyê dejê qelb û sîneyî ra ame berdene nêweşxane. Gergerlîoglu Nêweşxaneyê Bajarî yê Anqara de anjîyo bi û seba ke tansîyonê ci berzo serwîsê ciewnîyayîşê giranî rê ame wedaritene.

Lajê Gergerlîogluyî Salîh Gergerlîogluyî hesabê xo yê medyaya sosyale de pare kerd ke babîyê ci anjîyo bîyo û seba ke tansîyonê ci berzo ewro do serwîsê ciewnîyayîşê giranî de bimano.

Avûkatê Gergerlîogluyî Bîşar Abdî Alinakî zî derheqê rewşa peyêne ya Gergerlogluyî de zanayîş da vat: ''Gergerlîoglu nêweşê tansîyonê berzî yo. Nika serwîsê ciewnîyayîşê giranî de binê kontrolê doktaran de yo. Nê qewimîyayîşan ey ser zaf tesîr kerd. Nê serran de yewna tepişteyo nêweş zêdîya. Gergerlîoglu dima do bêro berdene Zîndanê Sîncanî.''