Wezîrê Karanê Zereyî yê Tirkîya Alî Yerlîkayayî 20ê teşrîna peyêne de hesabê xo yê Xî ser de îdîa kerdbi ke gerîlayê HPGyî Yunus Babayîgît û H.G. qezaya Kemahî ya Erzînganî de şer de şehîd bîyî.

Keyeyê Babayîgîtî îdîaya wezîrîye ra dima muracatê Dezgehê Tipê Edlîyî yê Erziromî kerd. La keyeyî rê ame vatene ke cenaza uca de nîya. Keyeyê Babayîgîtî dozgerî reyde qisey kerd. Dozgerîya Erzînganî keyeyî rê vat ke Babayîgît Zîndanê Erzînganî de yo la seba pêvînayîşê zîndanî destûr nêdîya keyeyî.

Avûkatê keyeyî xîretan ser o Zîndanê Erzînganî de Babayîgît de pêvînayîş kerd.

Ame parekerdene ke rewşa weşîya Babayîgîtî weş a.