Gerîlaya YJA Starî Gulcan Çelîke – Delîla Amede serra 2014 de tewrê mîyanê refanê PKK’yî bîye. Zap, Heftanîn, Behdînan û Botan de mucadele kerd.

Serra 1991 de qezaya Bismilî ya Amedî de amî dinya, zereyê keyeyêkê welatperwerî de pîl bîye û bi tesîrê Şorişê Rojawanî tewrê refanê şorişî bîye.

Şorişê cinî yê Rojawanî, hetê çeteyanê DAÎŞ’î ra îşxalkerdişê Şengalî, rotişê cinîyan ê Êzidîyan ê bazarê koleyan aye ser o xeylî tesîr kerd. Refê PKK’yî zî sey wareyê çareserîye dîyî.

“Domanîye ra mi partî nas kerde. Hemrayî, koyî her tim seba mi hesret bîyî û mi waştêne tewrê ci bibî. Qirkerdişê cinîyan o ke hetê çeteyanê DAÎŞ’î ra ame kerdene, heman wextî de kiştişê cinîyan ê pêroyîya dinya û dormeyê ma, bî sebeb ke ez nê halî qebûl nêkerî. Gama ke mi cinîyê Kurdî û Êzidîyî bazarê koleyan de dî, mi vat, ‚Çira her tim wazenê cinîyan bikerê kole.‘ Ko, hemrayîya mîyanê PKK’yî de wayîrê cayêkê xeylî cîyayî bi. Vînayîşo dûr ra û vînayîşo zere ra bi rastî zî xeylî cîya yo. Hemrayîya ke mi destpêk de zereyê PKK’yî de dîye cayêkê bînî de nêdî.”

Amede vat ke aye Zap de gerîlatî kerda û vat, „Her gerîla wazeno/a ke Vakur de bimano, ûca gerîlatî bikero. Gama ke ez newe amîya Zap, Zap seba mi xeylî cîya bi. Bi coxrafyaya xo û tarîx û merdimanê xo merdiman ser o tesîr keno. Ez mintiqaya Ertûşî de menda. Zap, mucadeleyê ûcayî û gerîlatîya ûcayî beno sebebê hemrayîyêka bêhempaye. Zap bi heybetê xo keno ke merdim/e bi ci bawer bo.“

Amede xoverdayîşê xoîdarekerdişî yê Vakurê Kurdistanî zî bi vîr vist û vat, „Serranê 2015-2016 de Amed, Cizîre, Nisêbîn û pêroyîya Kurdistanî de xoverdayîşêko pîl virazîya. Dişmen bi heme îmkan û teknîkî hêriş kerd, labelê nêeşka şarê ma bin fîno. Ma şopdarê mîrasê xoverdayîşî yê nê erdan ê. Ma şopdarê Çîyageran ê, Sevê û Pakîzeyan ê, biserfînayîşê nê mucadeleyî wezîfeyê ma yo. Vatişê ‚Se beno wa bibo do netîce bêhempa bo‘ yê embaz Çîyagerî seba ma wezîfe yo. Pratîkê ma do bibo cewabê ma yê seba nê vatişî.“

Delîla Amede ke nameyê Delîla Meyasere-Şenay Guçere dabi xo, hemrayî, îrade, mucadeleyê organîzekerdeyî û vengê cinîyan hemrayanê xo rê verdayî.