Cenazeya gerîla Selçuk Koseyî Nêweşxaneyê Dewlete yê Şirnexî ra ame girewtene, vecîbeyî dînî ameyî caardene û mehleya Doguşî ya qezaya Yazihanî ya Meletî de ameye definkerdene.

Perlamentera HDPyî ya Amedî Dersim Dage û xeylî endamê partî tewrê merasîmî bîyî. Heyetê HDPyî merasîmî ra dima şîyî banê tezîye û merdimanê Koseyî rê serweşîye waşte.

Ame dîyarkerdene ke merdimanê Koseyî wexto ke cenaze Şirnexî ra ardêne cayê kontrolî de polîsan înan rê zext kerdo û seba ke merasîmo gird nêvirazî ê tehdît kerdê.

CENAZEYA ÎBRAHÎM DÛRGÛNÎ AMEYE GIREWTENE

Hetê bînî ra gerîyalê HPGyî Îbrahîm Dûrgûno ke 11ê Temûze de Koyanê Amanosî de cuya xo vînî kerdbî, merdimanê ey hîrê aşman ra dima cenazeya ey girewte. Yeno pawitene ke cenazeya Dûrgûnî ewro Goristanê Guneykentî yê Mersînî de bêro definkerdene.