Îdarekarê Komeleya Kultur, Huner û Ziwanî ya Anka Mehmet Zekî Gonuldaşî derheqê teda, asîmîlasyon û qedexeyanê vera kurdkî de ANFyî rê qisey kerd.

Gonuldaşî îfade kerd ke ziwan vîrê komelêkî yo û vat: ''Metodê çinkerdişê şarêkî înkar û asîmîlasyonê ziwan û kulturê ê şarî yo. Seke Qanûnê Bingeyî yê Tirkîya de nuseno tirkî ra ber nê welatî de ziwanêk nêbeno ziwanê perwerdeyî. Kurdê ke şaranê esasan ê nê welatî ra yê, nêeşkenê bi ziwanê xo perwerde bivînê. Kurdî na cografya de hetê nufusî ra zêde yê. Coka bi ziwanê xo perwerdeyî wazenê la dewlete naye nêana ca.  Kurdî rixmê asîmîlasyonî zî wayîrê ziwan û kulturê xo vejîyenê. La eke polîtîkaya qedexe û asîmîlasyonî wina dewam bikera kurdkî çin biba. Rengêko cîy dewletêke yan zî komelêkî parçe nêkeno. Her rengo cîya zengînîyêka kulturel a.''

Gonuldaşî bale ante qedexekerdişê konser, kay û tîyatroyanê kurdan û tedayanê ziwanî ser û vat: ''Nê nêzdîbîyayîşê ke rojanê peyênan de vera kurdkî yenê mojnayene, pratîkê mezgê înkarî nîşan kenê. Ziwanê kurdkî rixmê înkarî zî resayo na aste. La bi şaristanijbîyayîşî asîmîlasyon xo zêdeyêr mojna. No nêzîbîyayîş hema zî dewam keno. Bi qiseykerdişê ziwanê dayîke, muzîk, kultur û hunerî dewletêke parçe nêbena.''

Mehmet Zekî Gonuldaşî derheqê Komeleya Anka de agahîyî dayî û da zanayene ke ê do 12ê hezîrane de dest pê karî bikerê. Gonuldaşî vat: ''Anqara de 7 serrî yo bingeyê ziwanî ser o karêk nêame kerdene. Verî komeleyêke est bîye û karê ziwanî kerdêne. La na komele ameye qefilnayene. Komeleya ma Anka de ma do bi kirdkî, sorankî zî perwerde bidê. Çalakîyê kultur û hunerî zî do bêrê kerdene. Ma do nê erdî de karanê kultur, aktîvîteyan û komxebatan bikerê.''