Wezîrê Karanê Teberî yê Yewîya Ewropa Bruksel de ameyî têhet. Wezîrê Karanê Teberî yê DYE Mîke Pompeoyî zî ame dawetkerdene.

Wezîrê Karanê Teberî yê Îngîlîstanî Jeremy Huntî Bruksel de eşkerayîye daye û vat, “Rîyê alozîyî ra ma bi fikar ê ke şer biqewemîyo. Ma do nê fikarê xo şirîkanê xo yê Ewropa û Mîke Pompeoyî reyde pare bikerê. Hewcadarîya ma bi demêkê aramî esta.”

Krîzê mîyanê DYE û Îranî  hewteyanê peyênan de zêde bi. Dimayo ke DYE peymana nukleerî ra apey ancîya, Îranî zî da zanayene ke ê do tayê xosergirewtişan bidê vindernayene.

Îran seba ke xo ambargoyanê ekonomîkî ra bixelisnayo, di mengî wext da welatanê Ewropa. Îranî da zanayene ke çarçewaya peymana nukleerî de sewbîna sînorkerdişan do biwedaro. Ewropa no ultîmatom red kerd.

Washîngton zî keştîyê şerî û bataryayê Patrîotî şawitî kendawe. Herême de teyareyê şerî û keştîyêka şerî zî esta.