Nobeta Azadîye ke semedê azadîya Rayberê Şarê Kurdî Abdullah Ocalanî vernîya Konseyê Ewropa (KE) de yena girewtene hewteyê 333ine de ya. No hewte bajarê Bordeauxî yê Fransa ra Zahîde Azake, Şerefnaz Buksure û Berkay Degerî ra grûbêk nobete dewr girewte.
Çalakwanan bi eşkerayîyêk Konseya Ewropa (KE) û Komîteya Vernîgirewtişê Îşkenceyan (CPT) rê hêrsê xo ard ziwan û înan ra waşt wa wazîfeyê xo biyarî ca û semedê wedartişê tecrîdî gamêk bierzî.
CPT LAL A MHME KERR A
Bi nameyê grûbe Berkay Degerî qisey kerd. Degerî tecrîdo girankerde yê serê Ocalanî vist vîrî û va:‘‘Mehkemaya Heqanê Merdiman a Ewropa (MHME) lal a û CPT zî kerr a. Eke babete bibo kurd û Kurdîstan qey heme dinya bêveng a? CPT û MHME ganî cade vengê ma bieşnawî û vera tecrîdî tê bigêrî. Ma sey şarê kurdî do heta serkewtişî bi qerarîye na çalakîye rê dewam bikerê. Ganî şarê ma semedê wedartişê tecdîrî wayîrê na çalakîye bivejîyo.‘‘