Bajarê Qamişloyî yê Rojawanî de 26ê nisane de Konferansê Yewîya Kurdan û Tewirê Hemparî yê Rojawanî ame kerdene. Badê konferansî îdareyê demdemî yê Şamî û Wezîrê Karanê Teberî yê Tirkî û Serekkomarê Tirkî bi tehdîtan nêrazîbîyayîş mojna ra. Hemsereka DEM Partî ya Wanî Gulcane Kaçmaz Sayyigita ke tewrê konferansî bîye, derheqê konferans û nêrazîbîyayîşanê vera ci de ANFyî rê qisey kerd.

Gulcane Kaçmaz Sayyigit ard ziwan ke badê cehdkerdiş û xebata derge de kurdî ameyî têh û nê vatî: ''Kurdê ke cîya cîya fikîryenê ameyî têhet û no konferans bi herfanê zerdan tarîx de da nuştene. Encamnameyê konferans de statuyê kurdan û Sûrîye de înşakerdişê pîyaciwîyayîşî ame waştene.

Eke leteyêkê Kurdîstanî de çîyêko pozîtîf ya zî negatîf bibo no tesîrê leteyanê bînan zî keno. Ma nika tesîrê vengdayîşê Birzê Abdullah Ocalanî yê 27ê sibate vînenê. Mesela eke Tirkîya û Vakur de semedê statu, nasname û ziwanê kurdan  tabloyo pozîtîf vejîyo werte, tesîrê leteyanê bînan zî keno. Xora kurdê Rojawan û Vakurê Kurdîstanî merdimê yewbînan ê. Coka her çîyo pozîtîf ke ûca qewimîyeno hetê psîkolojîk, sîyasî û soyalojîkî ra tesîrê parçeyê bînî keno.''

Gulcane Kaçmaz Sayyigit wina dewam kerd: ''Kurdê Rojawanî semedê Tirkîya tehlîke nîyê. Ê ûca de pîya bi şaranê bînan cehd kenê ke cuya hempare înşa bikerê. Zîyaretê ma yê ûcayî zî tewrbîyayîşê konferans zî mîyan nêbi. Badê vengdayîşê Birêz Ocalanî ma Başûr de zî tay zîyaretî kerdî.  Ma nê zîyaretanê xo de waşt fîkranê aktoranê kurdan ê derheqê prosesî bimûsê. Seba ke konferans zî raştê nê demî ame no semedê ma şansêk o. Semedê ma erjîyaye yo ke ma a roje ûca de bê û hela tarîxî rê şahîdîye kerde.''

Gulcane Kaçmaz Sayyigit vera eşkerayîyanê Ahmed Şara û Hakan Fîdanî yê ke badê konferansî ameyî dayene, nêrazîbîyayîş mojna û nê vatî: ''Konferans semedê cîyakerdişî nê eqsê ci de semedê pîyaciwîyayîşî ame kerdene. Şaran ûca de pîya modelêk înşa kerd ke heme şarî û bawerî nuqtaya hempare de ameyî yewca. Coka yewbîyayîşê ûcayî Tirkîya rê nêdano vînkerdene. Eqsê ci de eke yewîye û statuyê ûcayî bêro naskerdene, no Tirkîya rê dano qezenckerdene. Polîtîkaya dişmenîye ya vera kurdan Tirkîya rê dana vînîkerdene.''