Parlamentera DEM Partî ya Wanî Gulderene Varliya ke ANFyî rê qisey kerd grevê vêşanîye û Nobeta Edaletî vist vîrî û vat ganî waştişê tepişteyan bêrê caardene.

Gulderene Varli bale ante tecrîdê serê Rayberê Şarê Kurdî Abdullah Ocalanî ser û nê vatî: ''Îqîtîdarê tirkî wazeno ke bi tecrîdê serê Birêz Ocalanî kurdan bikero bêîrade û her çî ra mehrim biverdo. Ma zîndanan zîyaret kenê, tepişteyî hucreyan de yenê cakerdene. Grevê vêşanîye kewtî aşma 3ine. Tepişteyê sîyasîyî waştişanê xo de heqdar ê. Ganî nê waştişî bêrê caardene. Dişmenîya îqtîdarî ya vera kurdan nêqedîyena. Na dişmenîye nika da zaf zîndanan de yena caardene. Nobeta Edaletî rê zî tehemul nêkenê, xeylêk cayan de kenê ke verê ci bîgêrê. Tepişteyê  ke grevê vêşanîye de têna hucreyan de yenê tepiştene û awe ra zî mehrim yenê verdayene.

Bi komployê mîyanneteweyî û tecrîdê 25 serran kenê ke milê kurdan çewt bikerê la se kenê wa bikerî kurdî do çirey milê xo çewt nêkerê. Ma nêzanê rewşa Birêz Ocalanî senîn a. Rewşa ey şarê kurdî ra yena nimitene. Coka grevanê vêşanîye dest pêkerd. Dayîkê ma 65 rojî yo nobete tepişene. Mifteyê na mesele Bizêr Ocalan o. Nê nêvînayîşî ra ameyîş mesele çareser nêkeno. Çareserkerdişê meseleya kurdan bi Birêz Ocalanî mumkun o.

Tecrîd zaf xorî û tenik yeno caardene. Îrade, cuye û cografyaya kurdan rê qeyûm ameyo tayînkerdene.  Gama ke Birêz Ocalanî bi keye, avûkatan û heyetî reyde pêvînayîş kerdêne verê dîyalog û çareserî ame akerdene. Coka ganî tecrîd cade bêro wedaritene. Tecrîd têna şer û bêçareserî xorî keno. Semedê çareserî zî adres eşkera û zelal o.''