Wekîla Partîya Çep a Keske Gulîstane Kiliç Koçyigita ke derheqê serrgêra Komployê 9ê Teşrîna Verêne de qisey kerd, vat komplo û polîtîkayê tecrîdî bi xoverdayîşê şarê kurdî ameyî betalkerdene.

Koçyigite nê vatî: “Xora ma pero zanê ke senî engişta hêzanê mîyanneweteyî nê komployî de est a. Hêzê serdestî çirey nêverdenê şarê Rojhelatê Mîyanênî qederê xo tayîn bikerê. Çoka verî şaranê herême verdenê yewbînan, pêkewtişan vejenê û dima ra plananê xo anê ca. Nê semedî ra şaranê xoverdayoxan bitaybetî hedef genê. Coka şexsê Birêz Ocalanî de şarê kurdî ame hedefgirewtene. Sebebo verên ê komployî no yo. Nê çemberê adirî ra ma eşkenê bi paradîgmaya netewa demokratîke ya Birêz Ocalanî vejîyê. Semedê nê ganî tay gamî bêrê eştene. Sere de meseleya kurdan problemî eşkenê bi rayîrê demokratîk û haştîye bêrê çareserkerdene. Rojhelatê Mîyanênî de heme şarî eşkenê bê dişmenîya vera yewbînan biciwîyê. Birêz Ocalan formulê ney zaf rind fîneno meydan. Seba ke no plananê hêzanê mîyanneteweyî betal keno, tecrîd yeno xorîkerdene.

Îqtîdarê AKP-MHPyî zî semedê çînkerdişê destkewteyanê kurdan hêriş keno. Tirkîya ewro hêrişê Rojawanî kena. Nê pero sebebê komployî eşkera kenê. Hetê bînî ra kurdan û şaranê demokratîkan zî vera komployî cewabê xo da. Hêvîya haştîye ya şarê kurdî kerda zîndan, binê tecrîdî de tepişeni. No tecrîd vera sîyasetê demokratîkî yê kurdan o. Şexsê Birêz Ocalanî de vera ameyoxê kurdan tecrîd yeno rayraberdene. Pîya bi xorîbîyayîşê tecrîdî krîzê bînî  zî xorî benê. Polîtîkayê şer û pêkewtişî xorî benê. Qirkerdişê cinîyan zêdîyeno. Coka ganî ma pêro pîya vera komplo û tecrîdî vengê xo berz bikerê. Heta ke vera tecrîdê Îmraliyî mevejîyo, problemê bînî nêeşkenê bêrê çareserkerdene. Heta ke meseleya kurdan çareser nêbo, Tirkîya nêeşkena bibo demokratîke. Heta ke tecrîd mero wedaritene meseleya kurdan zî nîna çareserkerdene. Cunke muxatabo verên ê na mesele Birêz Ocalan o. Coka ganî Birêz Ocalan serbest bêro veradayene û azadîya ey waştiş çîyêko meşrû yo. Eke ma haştîye û azadîye wazenê ganî ma vera tecrîdî vengê xo vejê, tewir bîgêrê û çalakîyanê meşrûyan ê demokratîkan bikerê.”