Serekvekîya Grûba DEM Partî Gulîstane Kiliç Koçyigit meclîs de kombîyayîşê çapemenîye kerd û rojdem erjna.

Gulîstane Kiliç Koçyigit kombîyayîş de derheqê tecrîdê serê Rayberê Şarê Kurdî Abdullah Ocalanî de nê vatî: ''Seba ke Tirkîya qerarê Mehkemeya Heqanê Merdiman a Ewropa (MHME9) yê seba tecrîdê Îmraliyî nêard ca Komîteya Wezîranê Konseya Ewropa babete newera girewt rojdemê xo. Kombîyayîşê komîte ewro ra heta 19ê êlule do dewam bikero. Wezîrîya Edaletî xeylêk rey planê çalakîye hazir kerdî paketê hukmî hazir kerdî, îdîa kerd ke îşkence çîn o la  rixmo ke 10 serrî ravîyartî derheqê qerarê MHME qet gamêke nêameye eştene. Ganî Madeyê 25. yê  Qanûnê Înfazî bêro bedilnayene. Xeylêk tepişteyî est ê ke 25 serrî yo zîndan de yê. Înan ra yew zî Birêz Ocalan o.  Ganî Birêz Ocalan bi bedilnayîşê nê qanûnî çarçewya Heqê Hêvî de bêro tehlîyekerdene.

Hezar 500 avûkatan Wezîrîya Edaletî rê mektub şawit û waşt wa Ocalanî reyde pêvînayîş bêro kerdene.  Hezar û 500 avûkatî û dezgehê huqûqî wazenê ke Îmraliyî zîyaret bikerî. Şima çend sere bicenê xo ver û nêvînayîşî ra bêrê zî, şima çend bi ters û xofî şarê Tirkîya cum bikerî zî tecrîdê Îmraliyî heqîqetêk o heme dinya qala tecrîdê Îmraliyî kena. Her kes zano ke derheqê tecrîdê Îmraliyî de xeylêk çalakî, aktîvîte û muracatî ameyî kerdene. Mektubê peyênî de avûkatî vanê ke Îmrali de tecrîd est o û no nîno qebulkerdene.''