Berkin Elvano ke wexto Xoverdayîşê Gezî de  hetê polîsan ra ame qetilkerdene serrgêra 6. ya qetilkerdişê Goristanê Ferikoyî yê Şîşlîya Îstanbulî de serê gorê ci de ame yadkerdene.

Merdimanê Elvanî ya pîya avûkatî, parlamenterê HDPyî Huda Kaya û Ahmet Şik û xeylêk temsîlkarê partîyanê sîyasîyan û rêxistinanê demokratîkî yê komelî tewrê ci bîyî. Polîsan dormeyê goristanî girewt binê ablûqa û kesê ke ameyî serê înan gêrayî. Vera naye nêrazîbîyayîş ame ramojnayene.

Maye Gulsume Elvana ke  bi zorî payra vindertêne sereyê xo na serê gorê lajê xo ser û vat: ''Ewro roja bermayîş nîya. Maya to do mebermî, sere wedarî. Ez vêşanê to û edaletî ya.'' Pî Samî Elvanî zî vat: ''Neheqîyê ke ma ciwîyayî ewro zî dewam kenê. Lajê mi terorîst nîyo. Terorîst kam o eşkerayo. Ma edaletî rê vêşanî. Nê welatî de bi hezaran keyeyê sey ma estê. 18ê adare de roniştişê ma esto. Ez mehkeme ra çîyêk nêpawena la paştdayîşê şima pawena. Eke o qetilkar ceza bigêro no semedê mehkemeyanê bînan do bibo emsal.''