Vervatoxa HDPyî Ebru Gunay derheqê rewşa peyên a herêma erdlerzî, bipaykerdişê heqanê ke qewimîyenê û astenkerdişê hetkarîyan de Amed de eşkerayîya çapemenîye kerde.Qiseykerdişê Gunaye ra qismêk wina yo:

''Ma hela verêne ra herêmanê erdlerzî de yê. Nika 40 wekîlê ma pîya bi heşt heyetanê cîya cîyayan herêma erdlezî de yê. Semsûr, Mereş, Hatay, Osmanîye, Meletî, Amed, û Adana de wekîlê me aktîf war de yê. Reyna hemserekê  ma yê pêroyî Pevîne Buldan û Mîthat Sancar zî  herêmanê erdlerzî de şarî zîyaret kenê. Ma têna zîyaret nêkenê pîya bi şarê xo xebatê cigêrayîşî rayra benê.

Koordînasyonê ma yê krîzî pîya bi dezgehanê komeleyanê sîvîlan bi paştîdayîşê şarî ma semedê hetkarîye xebityenê. Bitaybetî ma xidaya bingeyî, awe, nan, kincanê germinan arêdanê, girîş û werdê gerguşan amade kenê. Heta nika 93ê tirê ma yê hetkarîye resayî herêmanê erdlerzî. Hendê nê tiran zî nika yenê amadekerdene. Şaredarîyê ma zî xebata aktîfî reyra benê. Silopî de tirê hetkarîye yê şaredarîya ma hetê qaymeqamîye ra ameyî tehdîtkerdene. Tirê Şaredarîya Patnosî zî hetê qaymeqamîye  ra ameyî destsernayene. Şar herêmanê erdlerzî de vêşan û têşan o la îqtîdar destûr nêdano hetkarî bireso ci.

îqtîdarî xora roja verêne ra mudaxaleyê rijnayîşî nêkerd. Ma pêrune bi çimanê xo dî, şarî binê rijnayîşî ra veng dayêne la qet selahîyetdarêk meydan de çînêbi.  Ma dî ke ekîbê weşîye ke ganî birîndaran derman bikerê nêeşkenê bikewê bajar û cenazayî kuçeyan de ameyî pawitene. Vizêr ez zî Semsûr de bîya. Baxçe de cenaza bibe, binê rijnayîşî ra veng ameyêne la ekîbê hetkarî çînêbî. Vînç çîn o, AFAD, zenge, huye çîn o. Îqtîdar rijnayîşî xorîyêr keno.

Îqtîdar keno ke bi qanûnê Halê Îstîsnayî bi  destê AFADî heme hetkarîye arêdo. Hemwelatîyê ma pê erdlerzî nêmerdî hetê îqtîdarî ra ameyî merdene. Bêtedbîrîya îqtîdarî ê mirnayî. Ma pratîkê AKPyî zanê. AKP do krîzî biçarno firset û erlerzî zî goreyê menfeatê xo bişuxulno. Pê îlankerdişê Halê Îstîsnayî kenê ke verê paştîdayîş komelî bigêrê û  şarê bajaranê erdlerzî mergî rê caverdê. Ma nê qebul nêkenê, xebatê ma yê hetkarî do dewam bikerê. Ma semedê kampanyaya xo ya paştîdayîş veng danê.''