Gunaye: Şar do peynîya şima bîyaro

Vervatoxa HDPyî Ebru Gunay bernameyê adare eşkera kerd û seba îqtîdarê AKP-MHPyî vat: ''Şar do peynîya înan bîyaro.''

Vervatoxa HDPyî Ebru Gunay bînaya merkezî ya partî de kombîyayîşê çapemenîye kerd. Qiseykerdişê ci ra beşêk wina yo:

''Tirkîya prosesêkê cidî de ya, îqtîdar pê polîtîkayanê xo komel fatisnayo. Îqtîdar çarçewa polîtîkaya tersnayîşî de hêrişê partîya ma keno. Sibate de nêzdîyê 500 endam û îdarekarê ma ameyî destbendkerdene, 40ê  nînan tepişîyayî û polîsan eşt xeylêk keyeyan ser. Derheqê partîya ma de 9 fezlekeyî ameyî amadekerdene.

Derdê îqtîdarî ma nîyê derdê îqtîdarî şarê ma yo. Hetkarê Serekê AKPyî vatbi 'lanet bêro rayanê înan.' Bi nê vatişan înan dişmenîya xo zî ardê ziwan. Îqtîdar dişmenê îradeyê şarî yo, dişmenê weçînayîşan o, dişmenê kurdan o. Ê komelêkê azadî nêwazenê.

Pê bahaneya korona kesê ke tewrê kongre û çalakîyanê HDPyî bîyî înan rê ceza dîyaye la ê pê konferansanê xo yê 'pirran' wasfanê xo danê. Nêverdenê 10-15ê wekîlê ma Kapikoy de eşkerayîyêke bidê. Esnafê ke nêeşkenê kîraya xo bidê, ciwanê bêkarî, cinîyê bêkarî, wendekarî wa manîfosteyê şima binivîsê û peynîya şima do bîyarê.''