Vervatoxa HDPyî Ebruye Gunay merkezê partîya xo de derheqê rojdemî de kombîyayîşê çapemenîye de qisey kerd.

''Destpêkê dewaya qefilnayîşî ra nata vera partîya ma bêhuqûqîye û binpaykerdişî dewam kenê. Tewr peyên hesabê ma yê hetkarîya xezîne ame blokekerdene. Bira nê kerdişî hetê Qesre ra ameye dayene. Hema dewaya qefilnayîşî nêameye netîcekerdene la bira winayêne dîyena. Dozgerê na dewa bi fermanan têgêreno. Na bire seba ke HDP amadekarîya weçînayîşî nêkero ameye dayene. Mehkemeya Qanûnê Bingeyî pê na bire tedaya sîyasîye binî de mende.  Îqtîdar pê na bire qesasê Weçînayîşê 7ê Hezîrane zî gêno.

Bi nê blokekerdişê şarê Tirkîya ameyî astengkerdene. La HDP do sey vewresî pîl bibo. Şima nêeşkenê nê şarî vindarnê. Têkoşînê HDPyî her ke şino beno pîlêr. Ma bi hêzê şarê xo tîya de yê. Êyê ke wazenê HDPyî biqefilnê do nêeşkê verê îradeyê şarî bigêrê. HDP rixmê nê teda û hêrişan zî estbîyayîşê xo rê do dewam bikero. Ma venga muxalefetî danê ke bêrê ma pîya asayîşê sindoqan bîyarê ca û verê kayanê îqtîdarî bigêrê.

Seba ke îqtîdar vera ma hende kayan, hêrişan û tedayan keno ma zî zîyaretê înan ê seba pêvînayîşê qanûnê laçikî red kerd. Ma nêwazenê îqtîdar de pêvînayîş bikerê û bi nê hawayî reklamê înan bikerê.

Ma do sey Îtîfaqê Kede û Azadîye 15ê çeleyî de Meydanê Kartalî yê Îstanbulî de mîtîngê xo bikerê. Ma venga her kesî danê ke vera faşîzmî, kolonyalîzmî, vêşanîye, bêkarîye û tecrîdî tewrê nê mîtîngî bibo.''