Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' derbazê safhayêka newîye bîye. Na çarçewe de Platformê Dezgehanê Demokratîkan 13ê teşrîna verêne de Amed de bi şîarê 'Ma vera komployî xo ver danê, seba azadîye Amed de kom benê' mîtîngêkê pîlî bikero. Hemserekê DBPyî yê Amedî Mehmet Şîrîn Gunduzî derheqê babete de ANFyî rê qisey kerd.

Gunduzî dîyar kerd ke atmosferê tecrîdî serwer o û vat: ''Tecrîdî her cayê Kurdîstanî de giran bîyo. Şexsê Birêz Ocalanî de şarê ma yeno tecrîdkerdene. Coka ma nê tecrîdî sey tecrîdêkê zîndanî nêvînenê. Hetê huqûqî ra xora yew bingeyê nê tecrîdî çin o. No tecrîd tesîrê cografyaya ma, temamîya Rojhelatê Mîyanênî keno. Tirkîya bi polîtîkaya tecrîdî sûcî kena

Krîzê giranî zî netîceyê polîtîtkaya tecrîdî yê. Çareserîya nê krîzan bi perspektîfê Birêz Ocalanî mumkînn a. La tecrîd verê çareserîya meseleyan gêno. Îqtîdaro ke çareserîye nêwazeno, keno ke tecrîd nêbo rojdem. Ma do Amed de nê çîyan biqîrê û bimojnê. Medyaya tirkan zî çalakîyanê vera tecrîdî nêvînena û nêmojnena komelî. Ma zî vera ney çalakîyanê xo rê dewam kenê. Heta ke îqtîdarê AKPyî rojdemê tecrîdî cidî bigêro û bi Birêz Ocalanî dest pê projeyê dîyalogan bikero; heta ke azadîya Birêz Ocalanî bêra caardene ma do nê çalakîyan ra fek vera nêdê.''

Gunduzî bale ante mîtîngê Amedî ser û vat: ''Ma azadîye vera tecrîdî, dîyalogan vera tecrîdî, çareserîye vera tecrîdî pawenê. Zîndanan de bi seyan nêweşî est ê. Xeylêk tepişteyî est ê înfazê înan ameyê vêşnayene. Ma azadîya embazanê xo yê tepişteyan wazenê. Ma wazenê ke wa tecrîdê vera Birêz Ocalan wedarîyo. Ma do Amed de nê waştişanê xo biqîrê. Ma venga şarê xo danê ke tewrê nê mîtîngî bibo. Ganî şarê ma Amedî ra seba azadîye û dîyalogan veng bido, destê haştîye Amedî ra derg bikero. Ma do waştişê şarê kurdî Amedî ra biresê rayaumûmîya dinya.''