Kombîyayîşê peyênî yê NATOyî de dewleta tirke qebul kerd ke Swêd wa bibo endamê NATOyî. Serekkomarê Tirkîya Erdogan, Sekreterê NATOyî Jens stoltenberg û Serekwezîrê Swêdî Ulf Kristerssonî pêvînayîş kerdî. Erdoganî soz da ke protokolê endamîya Swêdî Meclîsê Tirkîya de rojdem bikero. Seba ke Meclîsê Tirkîya tehtîl de yo hema endamîya Swêdî ya bi NATOyî nêameye tesdîqkerdene. La Swêdî seba ke zerrîya dewleta tirke bikera qebul kerd ke 'qanûnê terorî'  vejo. 'Qanûnê terorî' bi taybetî kurdê ke Swêd de ciwîyenê keno hedef.

Sekreterê Mîyanneteweyî yê Partîya Komunîste ya Swêdî Karl Gunnarsonî derheqê babete de ANFyî rê qisey kerd.

Gunnarsonî ard ziwan ke Erdoganî veerê cû endamîya Swêdî nêwaştêne û vat: ''Seba ke Swêdî tesdîqê Tirkîya bigêro zaf xîret kerd. Hukmatê Swêdî û Parlamentoyê Swêdî seba ke bibo endamê NATOyî qanûnê terorî waştişê Tirkîya ser o qebul kerd ke no zî tawîzêko pîl o. Netîceya nê qanûnî de aktîvîstê kurdî teslîmê Tirkîya ameyî kerdene û îhtîmalêko pîl o ke zîndan de nê aktîvîstî raştîya îşkenceyî ameyî. Partîya Komunîste ya Swêdî no şermezar kerd.''

Gunnarsonî îfade kerd ke Swêdî şert û mercê hukmatê Erdoganî qebul kerdê û no zî mojneno ke endamîya NATOyî Swêdî rê zaf girîng a. Gunnarsonî vat: ''NATO îtîfaqêko leşkerî yo emperyalîst o û seba menfaetanê sermayeyanê endamanê xo têgêreno. Yanî menfaetê NATOyî dûştê menfaetanê şaran o. Partîya ma endamîya Swêdî şermezar kena û vera ney têgêrena.''

Karl Gunnersonî pare kerd ke seba ke Swêdî waştişê Erdoganî qebul kerdî rayaumûmîye de hêrs virazîyayo û vat: ''Vera endamîya Swêdî ya bi NATOyî muxalefetêk est o la heyf ke no muxalefet qels o.''