Hemsereka KCDyî û parlamentera HDPyî ya Colemêrgî Leyla Guvene seba tecrîdê serê Rayberê Şarê Kurdî Abdullah Ocalanî wedarîyo kewtebî grevê vêşanîye. Guvene rixmê sey parlamentere vîjîyayîşî de zî nêamîbî tehlîyekerdene.

Guvena ke Zîndanê Tîpê Eyî yê Amedî de ya bi rayîrê avûkatan persanê ANFyî rê cewabî dayî.

DIŞMENÎYA KURDAN DEWRE DE YA

Guvene halê kurdan ê çar perçeyan ser o wina vat: “Îran de ciwanê kurdî yê şorişgêrî bi gonîwerkî yenê kiştene. Iraq de rixmê sînoranê bewlîkerdeyan de hukmato merkezî hemverê Kurdistanê federeyî de gefan weno. Sûrîye de heta vizêr nasname nêdîyayêne kurdan, ewro înan sîstemê xo awan kenê. Labelê hêzê cayîyî û hêzê serdestî yê mîyanneteweyîyî wazenê vernî ro înan bigîrê. Tirkîye de zî dişmenîya hemverê kurdan dewam kena.”

CEHDÊ AŞITÎ AMEYÎ DÛRFÎNAYENE

Guvene vat ke mesajê Ocalanî yê Newrozê 2013î de amebi vatene ke bê xêzkerdişê sînoran zî çareserîya mendeye mumkun a, şarê kurd û tirkî eşkenê pîya biciwîyê û bê ke îhtîyacî bi hêzêkê teberî bibo mesele eşkeno bêro halkerdene.

Guvene vat: “Nizdê 3 serrî şer, dej û hesirî ameyî dereceya tewr taye. Cimatî dî ke halê nêpêkewtişî halêko rind o. Gama ke dore amî gamanê esasîyan tayê hêzî kewtî dewre û heme cehdî erzîyayî kenarêk. Reyna pêkewtişî destpêkerdî.”

TECRÎD KARÊ ÎNAN O EWILÊN BI

Guvene dewamê qiseykerdişê xo de vat: “Bi destpêkerdişê prosesê pêkewtişî karê înan o ewilên Rayberê Şarê Kurdî Abdullah Ocalanî ser o tetbîqkerdişê tecrîdî bi. Înan waşt ke vernî ro vilabîyayîşê fikranê Ocalanî bigîrê. Çunke vatişê ê yê derheqê ameyoxî de raşt vejîyayêne. Ma zanê ke tecrîd polîtîkayêka mîyanneteweyî ya. Sere de CPT xeylî sazîyê ke eleqedar ê hemverê îxlalkerdişê heqan de kayê ‘hîrê meymûnî’ kay kenê. Dewleta tirkî wazena ke raştîya kurd û Kurdistanî krîmînalîze bikero, tayê dormeyî zî hemverê nê de tenya pozîsyonê temaşekerdoxî de yê.”

HALO NIKAYÊN NÊEŞKENO BÊRO DEWAMKERDENE

Guvene ard ziwan ke tecrîd sûcêkê merdimayîye yo û wina vat: “Mumkun nêyo ke ma ne halî qebûl bikerê. Xeylî paytextanê Ewropa de bi des hezaran kurdî bi serran o mîyanê çalakîyan de yê. Bero ke înan nêcenit nêmend. Rixmê nînan de zî sazîyê têkildarî meseleyî dir eleqedar nêbenê. No hal wina dewam nêkeno, ganî no bêro zanayene.”

EZ TECRÎDÎ HEMVERÊ XO DE ZÎ HESIBNENA

Guvene vat: “Netîce de mi waşt ke ez Zîndanê Amedî ra, dêzê xoverdayîşî ra bibî tercumanê hîsanê şarê ma yê fedakarî. Wa xelet mero famkerdene, bi hezaran fedaîyê nê şarî estê û înan seba Ocalanî her tewir çalakîyî viraştê. Ez sey cinîyêka kurde, mi xo bi îdeolojîya azadî û xelesnayîşî yê Ocalanî nas kerd. Helbet bi çalakîyêka grevê vêşanî no mesele hal nêbeno. La ez hîsê morcelayêk ke awe seba Hz. Îbrahîmî kirişena mîyan de ya. Çalakîyê ke nê zîndanî de virazîyayê tarîxê kurdan vurnayo. Mi bi hurmetê xo yê seba înan na çalakî da destpêkerdene.”

HETA TECRÎD WEDARÎYO

Leyla Guvene peynî de nê ardî ziwan : “Heta tecrîd wedarîyo do cehdê ma dewam bikero. Ez şarê ma ra wazena vajî ke heta tecrîd nêqedîyo ma yew zî nêeşkenê xo azad hîs bikerê. Hemverê tecrîdî de bêvengmendiş nê sûcî rê hempar bîyayîş o. Ganî her kes gureyo ke milê ci de yo bica biyaro. Ancax bi mucadeleyê ma do şertî raşt bibê û birêz Ocalan ancî bieşko rolê xo kay bikero.”