Hemsereka KCDyî û parlamentera HDPyî ya Colemêrgî Leyla Guvena ke 65 rojî yo seba wedartişê tecrîdê serê Rayberê Şarê Kurdî Abdullah Ocalanî grevê vêşanîye de ya û weşîya ci merhaleya krîtîke de ya vat ke vizêr vengê çalakwanan şiyo aye.
Kênaya Guvene Sabîha Temîzkane hesabê xo yê medyaya sosyale ser a da zanayene ke aye bi telefonî maya xo dir qisey kerd û nê parî kerdî: ‘‘Maya mi bi hetkarîya personelê zîndanî ameye serê telefon û vat ke bi sebebo ke xebere aye tede estê ewro rojanameyê Yenî Yaşami nêdîyayo ci. Maya mi vat ke aye vizêr vengê çalakwananê verê zîndanî eşnawito û înan rê silamê xo şawitî.‘‘