Bi waştişê wedartişê tecrîdê serê Rayberê Şarê Kurdî Abdullah Ocalanî grevkerdoxê ke Zîndanê Tarsûsî yê Tîpê T’yî yê Hûmara 1’î de kewtê grevê vêşanîye, halê weşîya înan ver bi xirabîye şino. Heman wextî de ame zanayene selahîyetdarê zîndanî îhtîyacîyanê grevkerdoxan bica nêanê.

Nê zîndanî de Halef Yîgît û Mûrat Karaaslan 5’ê Çele de, Erkan Taşkan, Veysî Denîzhan û Îhsan Taşdelen zî 12’ê Çele de kewtîbî grevê vêşanîye yê bêdem û bêagêrayîşî. Yîgîtî vizêr bi rayîrê telefonî keyeyê xo dir qisey kerd û ard ziwan ke halê weşîye yê kesanê ke grevê vêşanîye de yê ver bi xirabîye şino.

Yîgîtî keyeyê xo ra vat zinca Taşkanî ra gonî yena û dewxa ci şina, dest û wucûdê Taşkanî de masayîş virazîyayo, çimê Denîzhanî de vînayîş bîyo kemî, madeyê Karaaslanî ra zî gonî yena û kîşta dejê madeyî de çimê ê zî dejenê.

Yîgîtî keyeyê xo ra vat grevkerdoxanê bînan de zî problemê sey dewxeşîyayîşî, viritişî û bêhewnîye estê. Yîgîtî bi rayîrê keyeyê xo veng da rayapêroyîye û vat ‘Veng bidê vengê ma.’