Mizgîn Bîlîne (Raperîn Baze) ke 13ê êlule de Çewlîg de hîrê embazanê xo ya pîya pêkewtiş de şehîd kewtbî, bajarê Hamburgî yê Almanya de ameyî vîr ardene.

Vîrardişo ke Merkezê Demokratîke yê Komelê Kurdan de ame viraştene, Bremen, Kassel û bajaranê dormeyî ra bi seyan kesî tewr bîyî.

Vîrardiş hetê Komîsyonê Keyeyê Şehîdan ra ame viraştene û bi rêzgirewtişî dest pêkerd. Dima zî ser nameyê komîsyonî Ayten Dûrmûşe qisey kerde. Dûrmûşe va: "Eke ma wextê ci de hol wayîrê têkoşînî bivejîyayêne, ewro Mîzgînî şehîd nêkewtenî."

Aktîvîsta cinîye Done Guzele zî dîyar kerde ke tena bi têkoşîn û xeta şehîdan de rayîrraşîyayîşî kes eşkeno şehîdan rê heskerdişê xo ramojno/a.

Babîyê Raperîn Baze Selahattîn Bîlînî zî ard ziwan ke kurdî nêwazenê kes bimiro û wina domna: "Ganê ma biveşo zî ma nêwazenê ke wa ganê sewbîna kesan biveşo. Keynaya mi tim vera nêheqîye de xover daye. Seba ke şima ameyî tîya û wayîrê keynaya mi vejîyayî, dejê ma şenik bîyo."

Vîrardiş de hemşaredarê verênî yê Amedî Firat Anli, sîyasetmedarê kurdan Mehmet Emîn Yildiz û Saît Bîlgînî zî qiseykerdişêk kerd.

Mehmet Emîn Yildizî Şêx Seîdan ra heta Seyîd Rizayan xoverdayîşê Kurdan vist vîr û wina va: "Rixmê peroyê hêrişê dişmenî, şarê kurdî qet vera zilm û zordarîyan de milê xo çewt nêkerd. Gerîlayê azadîye ewro têkoşînêko erjaye danî. Gerîlayê PKKyî têkoşînêk danî, çîyêko winasî tarîxê dinya de çin o. Ma şehîdanî xo rê zaf çî deyndar î. Şarê kurdî dewrêko zehmetin ra ravêreno la ma êdî merheleyo peyên de yî. Kurdîstan azade beno, do bêro azade kerdene. Eke ma wayîrê dewaya xo bivejîyê, serkewtiş nizdî yo. Dewlete bi peroyê hêzê xo wazena ke kurdan çin bikera. Eke ma xeta şehîdanê xo de yew bî û pêro pîya têkoşîn bidê, ti qewet nêşkeno ma."

Vîrardiş bi ramojnayîşê sînevîzyonî qedîya.