Seba gerîla Mizgîn Biline ( Raparîn Baze) Hamburg de tezîye ameye ronayene. Mele Fermanî dîyar kerd ke peygamberan zî vera dîktatorîye têkoşîn dayo û waşte ke wa vera dîktatorîya Erdoganî de têkoşîn bêro berz kerdene.
Gerîla Mizgîn Biline ( Raparîn Baze) ke 13ê êlule de Çewlîg de şehîd kewtbî, seba aye bajarê Hamburgî yê Almanya de tezîye ameye ronayene.
Tezîye Merkezê Komelê Demokratîkî yê Kurdan yê Hamburgî de yena viraştene. Babîyê Raperîn Baze Selahatîn Bilinî û merdimê ey serweşîyan qebûl kenî.
Merkezê Komelê Demokratîkî yê Kurdan ke tezîye tede yena viraştene, posterê embazanê Raperîn Baze ke eynî hêrişê hawayî de şehîd bîye, Mûherem Bîngol ( Egîd Hazmaz) Sînem Arslan ( Hêvî Roger Destan) û Firat Bûlût ( Şerwan Çewlîk) zî ameyî aliqnayene.
Roja yewşeme (siba) saete 16:00 de cayê tezîye de vîrardişêk do bêro viraştene.
GANÎ ŞARÊ KURDÎ XETÊ ŞEHÎDANÊ XO DE TÊKOŞÎN BERZ BIKERO
Tezîye de Meleyê Camîya Şêx Seîdî Fermanî qisey kerd. Fermanî dîyar kerd ke şarê kurdî şehîdanê xo rê zaf çî dêndaro û ganî şar rêçê şehîdanê xo ra şiro û wina domna: ‘’Şehîdê Kurdîstanî ke seba şarê xo, ganê xo feda kerdo bimbarekê ma yê tewr girde. Peroyê peygamberan vera zilmî de têkoşîn dayo. Ewro zî vera zilm o zordarîye de gerîlayê Kurdîstanî têkoşîn danî. Ganî ma zî vera dîktatorîya Erdoganî de bêveng memanê û ça beno wa bibe têkoşînî berze bikerê.’’
Per o bîn ra meyîtê gerîla Mizgîn Biline ( Raparîn Baze) seba testê DNA hema Malatya de yeno pawitene.
