Hatîmogûllari: Ganî hendî çareserîyêka rastekêne bêro peydakerdene

Parlamentera HDP’yî ya Edeneyî Tulay Hatîmogûllari vat vero ke zîndanan de merdimî cuya xo vînî bikerê ganî hendî çareserîyêka rastekêne bêro peydakerdene û vat, “Ma pawenê ke bê ke netîceyêko nebaş vejîyo werte, gamî bêrê eştene.”

Seba qedîyayîşê tecrîdkerdişê Rayberê Şarê Kurdî Abdullah Ocalanî, Tirkîya, Kurdistan û Ewropa de çalakîyê grevê vêşanîye û rojeyê mergî dewam kenê. Parlamentera HDP’yî ya Edeneyî Tulay Hatîmogûllari, grevê vêşanîye û rojeyê mergî ajansê ma rê ercnayî.

Hatîmogûllari ard ziwan ke waştişê xoverdayoxan roja destpêkî ra waştişê heqdar ê û vat dewlete heta nika seba qedînayîşê tecrîdî gamêka rastekêne nêeşta. Hatîmogûllari vist vîrî çalakîyê grevê vêşanîye yê ke bi serkêşîya Leyla Guvene dest pêkerdî 183 rojî xo ra dima verdayî û vat çalakîya grevê vêşanîye ya ke hetê bi hezaran kesan ra yena domnayene beno ke hendî bibo sebebê zirarêkê pîlî.

Hatîmogûllari bale ante serê 30 tepişteyanê ke grevê vêşanîye açarnayê rojeyê mergî û vat, “Sey rojeyê mergî grevanê vêşanîye zî kom bi kome dest pêkerdibi û dima ra heme zîndanan de vila bîbî û bi hezaran kesî tewrê ci bîbî. Ez bifikar a; eke hukmat yan zî Wezaretê Karanê Zereyî gamêk nêerzo do rojeyê mergî vila bibo. Halo nikayên, ma û keyeyanê kesanê ke grevê vêşanîye de yê fîneno mîyanê ters û fikaran. Tena ma nê, her kesê ke wayîrê wijdanî yê bifikar ê. Ganî hendî selahîyetdarî peynî ro fikaran bîyarê û tecrîd vatiş de nê la pratîk de biqedîyo.”

‘Îqtîdarî Welat Fîna Na Venganîye’

Hatîmogûllari heman wextî de bale ante serê bêxemîya hukmatî ya xoverdayîşê hemverê tecrîdî û vat tewirêko bi nê hawayî faşîzmî hîna keno xurt. Hatîmogûllari derheqe çetinîya polîsan a hemverê mayanê tepişteyan de zî vat, “Mayê tepişteyan nika her cayê welatî de seba heqê cuye çalakîyan virazenê. Ma vînenê ke bi çetinîya girane polîsî hêrişê mayan kenê. Gebze, Amed û xeylî cayanê bînan ê Tirkîya de zextan serê mayanê ma de kenê. Îqtîdarî welat visto nê halî. Ma wextêkê winayênî de yê ke kîn, hêrs û hemverîye resaya dereceya tewr berze.”

Hatîmogûllari fikarê xo yê derheqê xoverdayîşê grevê vêşanîye û rojeyê mergî reyna ard ziwan û vat vero ke visyayîşo hîsdarkî virazîyo ganî îqtîdar peynî ro tecrîdî bîyaro û wina dewam kerd: “Eke merdimî zîndanan de cuya xo vînî bikerê, na yewe do mîyanê cimatî de cîyabîyayîşê hîsdarkîyî xo dir bîyaro, do hemverîye hînan bibo vêşî. Ma veng danê îqtîdarî ke goreyê qanûnê bingeyênî tê bigêro. Mexmelê sipîyî yê sereyê mayan bi mengan o pak û sipî yê. Îqtîdar bi kaşkerdiş, bi şidetê serê mayan keno ke mexmelanê înan leymin bikerê. Rixmê muameleyanê faşîzanan de û zext û çetinîya  îqtîdarî de mayî aşitîye pawenê, heqê cuye pawenê. Hêzê îqtîdarê nikayênî çi rey do qîm nêkero ke mexmelê sipîyî yê mayan leymin bibê.

Ma vengdayîşê xo tekrar kenê. Vero ke zîndanan û teber de merdimî cuya xo vînî bikerê ganî hendî çareserîyêka rastekêne bêro peydakerdene. Ganî waştişî bêrê bicaardene û game rastekênî bêrê eştene.”