Hemsereka Pêroyî ya  Partîya Têdûştîye û Demokrasîyî ya Şaran (HEDEP) Tulaye Hatimogullari semedê tay zîyaretan ameye Riha. Hatimogullari ke têhetameyîşê şarî de qisey kerd vat Riha zaf bedelê giranî dayî û nê vatî: ''Gama DAÎŞî hêrişê Kobanê kerd tîya tarîx ame nuştene. Paştdayîşo tewr pîl Riha ra dîya Kobanê. Xora şarê Riha bedelê nê zaf giranan dano. Xeylêk bajaranê ma yê sînorî de çeteyê dişmenê merdimîye yê sey DAÎŞ û El Nusra gêrenê.''

Hatimogullari bale ante rewşa tepişteyanê nêweşan û êyê ke rixmo ke cezaya xo anta nînê veradayene û vat; ''Nê welat de rejîm bedilya. Rejîmo faşîsto ke nê welatî îdare keno, rewşa zîndanan giranêr kerde. Zereyê zîndanan de zîndanî înşa kerdî. Destur nêdanê tepişteyê nêweşî şirê nêweşxane zî. Nika zîndanan de semedê wedaritişê tecrîdê serê Birêz Ocalanî grevê vêşanîye yê bidorî dîya destpêkerdene. Çîyo ke yeno waştene heqê merdiman o, caardişê qanûnê bingeyî yê Tirkîya yo. Êyê ke nînan nê anî ca benê sebebê ci ke însanî bedenê xo bidê vêşanîye ver.  Ma Riha ra venga pêro Tirkîya danê. Wa tecrîdê serê Birêz Ocalanî cade bêro wedaritene û wa azadîya ci ya fîzîkîye cade bêro caardene.''

Hatimogullari vat: ''Ma sey HEDEPî seba ke Tirkîya û Kurdîstan de problemî bi metodanê demokratîkan bêrê çareserkerdene têkoşîn kerd. Ma dirîyîye nêkenê. Erdogano ke vano 'Wa domanê Filîstînî memirê' eynî saetan de hêrişê domananê kurdan ê Rojawanî keno. Ma nê qebul nêkenê.  Ma sey vizêrî ewro zî paştî danê şarê Filistinî. Ma Erdoganî rê vanê ke çîyanê ke ti semedê domananê Filistinî vanê, semedê domananê kurdan zî vaje. La semedê nê cesaretê to çîn o.

Weçînitişê herêmî bîyî nizdî. Ma şarê xo rê vanê ke wa xebatanê xo xurtêr bikero. Wa heme Tirkîya û dinya bieşnawo ke Riha de ma do heme şaredarîyanê xo  destê qeyûman ra peyser bîgêrê. Şarê ma do xo bi xo îdare bikero. Ma do sey HEDEPî sey vizêrî ewro zî semedê demokratîkbîyayîşê welatî û semedê çareserkerdişê meseleya kurdan têkoşînê xo bidomnê. Îqtîdaro ke cinîyan çîn hesibneno ma do vera ci têkoşînê cinîyan xurtêr bikerê. Senî ke vengo ke Jîna Emînî Îran de kerd berz, sey venganê 'jin,jiyan, azadî' ma cinîyî ma do têkoşînê xo xurtêr bikerê.''