Hetkara Serekê Şaredarîya Seyhanî Funda Buyruk bi fermanê Wezîrîya Karanê Zereyî wezîfe ra amebî girewtene. Platformê Cinîyan ê Adana derheqê babete de Parka Heykellî de eşkerayîye daye. Wekîla HDPyî ya Adana Tulaye Hatîmogullari, Hemsereka HDPyî ya Adana Helîne kaya, Endamê Meclîsê Cinîyan, aktîvîstê TJA û xeylêk cinîyî beşdarê eşkerayîye bîyî. Eşkerayîye de sloganê sey 'Funda Buyruk têna nîya' ameyî vatene.

Avûkate Ayşe Zîlan eşkerayîye wende û vat: ''Ma xeberan de dî ke Funda karî ra ameya girewtene. Eke bingeyê înan de zulm est o, ê ma de zî xoverdayîş est o. Nê kerdişî parçeyê huqûqê dişmenîye yê. Ma vera hêrişan tim hetê Funda de ca bigêrê.''

Wekîle Tulaye Hatîmogullari zî eşkerayîye de qisey kerd û vat: ''Komeleya Binevşe de kamera ronîyaya û qeydê vengî sey delîlî ameyî hesibnayene. Na dosya tarîx de sey rontgenwanîyêka Wezîrê Karanê Zereyî bêra nuştene. Oda, ca û waranê cinîyan de kamerayî yenê cakerdene. Bi nê kerdişî mesajê 'Eke şima HDP hetî de têbigêrê do bivêşê' dîyeno muxalefetî zî. Hişmendîya Soyluyî ya 'Şima pê bivînê' hetê şaran ra do bêra muhakemekerdene.''