Hemserekê Komîsyonê Ziwan, Kultur, Huner û Polîtîkayanê Perwerdeyî yê HDPyî Salîm Kaplamî eşkerayîyêka nuştekîye daye û vat: ''Ma teda û zorbazîya vera kurdkî qebul nêkenê.''

Eşkerayîye de ame parekerdene ke wextê peyênî de îqtîdar tedaya vera kurdkî zêdînaya, pê destê qeyûman dezgeh û sazgehê ziwan û kulturê kurdan qefilnayî, nameyê bi kurdkî yê kuçe û parkan vurnayî, dezgehanê çapemenîya kurdkî rê dewayî akerdî.

Eşkerayîye wina dewam kena: ''Mudirîya Înfazê Ceza ya Xarpêtî Wekîla ma ya Colemêrgî Leyla Guven, Hemsereka HDPyî ya Amedî Alokmen Uyanik û Sereka Partîya Bindestan a Sosyalîste (ESP) Fethîye Ok Çetîn û 9 tepişteyê bînî verê tehqîqatî de yê. Hetê bînî ra semedo ke wextê kombîyayîşê şarî yê HDPyî Xarpêt de parkêke de deyîra kurdkî ameye vatene parke qasê 30 rojan ameye morkerdene. Dewlete 1960an de semedo ke şarî kurdkî qisey kerdêne ceza dayêne, 1980an de kampanyaya 'Tirkî qisey bikerê, zaf qisey bikerê' serûber kerdêne ewro zî semedo ke Leyla Guven û embazanê ci bi kurdkî deyîr vate ceza dana. Heta ke na hîşmendîye nêvurîya demokrasî yan zî azadîye nêna nê erdî.

Dewlete pê pratîkê xo ziwanê kurdkî krîmînalîze kena û wazena bi temamî kudkî werte ra wedarna. Ma teda û zorbazîya vera kurdkî qebul nêkenê. Ma do heta peynî vera nê tewiranê serê kurdkî têkoşîn bikerê. Ziwanê ma Rûmetê ma yo!''