Hetkarê hemserekê pêroyî yê HDP’yî Alî Urkuto ke Têkilîyanê Partîyanê Sîyasî yan û Wareyê Keder a mesuldar o, bi wesîleya serrgêra Qirkerdişê Soma ewro eşkerayîyêka nûştekîye daye.

Urkutî 301 karkerê madenî yê ke ameyî qetlkerdene bi vîr ardî û vat, “Qirkerdişê madenê Soma tena facîaya a roje nêya. No qirkerdiş netîceyê serranê dergan ê polîtîkayê neolîberalî yê ke yenê bicaardene û şertê berardişî yê ‘malîyeto tay-karo zaf, tay wext-zaf kar’ virazîyayo.

‘Înan Mesuldarê Facîa Xelatdar Kerdî’

Urkutî bale ante rixmo ke serê qirkerdişî ra 5 serrî ravêrtê zî seba vernîgirewtişê kiştişanê karî tu tedbîrêk nêameyo girewtene û vat, “Çîyo hîna xirab wayîrê Kargehê Komirî yê Soma A.Ş.’yî û mesuldarê qirkerdişî yê hûmara yewine Can Gurkan dimayê cezayêk ke mendêne xelate ame tehlîyekerdene. Bi tehlîyekerdişî zî nêvindertî, qerarê dadgehî yo ke vetişê madenî yê a ocaxe qedexe kerdibi zî ame wedaritene û vernîya bikarardişê kargehê madenî amî akerdene.”

‘AKP Hemverê Kiştişanê Karî de Çimanê Xo Gêno’

Hetkarê hemserekê pêroyî yê HDP’yî Alî Urkutî vat AKP hemverê kiştişanê karî de çimanê xo gêno û nê vatî: “Madenan de şerto verên ê vernîgirewtişê mergan peynîciardişê bicaardişê rodovansî yo, ganî bê ke karî bifikrê nê madenî hetê dewlete ra bêrê bikarardene. Ganî bê kontrolan û sehnayîşan berdayîşî rê destûr nêdîyo. Qetîyen qanûnê karî, qanûnê sendika, peymannameyo pêserkî û qanûnê grevî zî tede sererastkerdişê ke nîzamêkê karî yê neweyî yo ke pawitişê heqan ser o ameyo ronayene bêrê kerdene.”