Darbeya qeyûmî ke 19'ê Tebaxe de dest pêkerde û şaredarîyanê şaristanan ê pîlan ê Amed, Wan û Mêrdînî yê HDP'yî ameyî destsernayene, 19'ê Teşrîna Verêne de do mengan xo ra dima biverdo. Merkezê Koordînasyonê Krîzî yê verba Qeyûman ê HDP'yî roja Çarşeme kom bi û plansazîya çalakîyan amade kerde.

HDP'yî qerar girewt ke heta 19'ê Teşrîna Verêne bi hewayêkê demokratîkî çalakîyan bike û nêrazîbîyayîşê xo bimojne. Qerarê ke hetê koordînasyonî ra ameyî girewtene hetê Heyetê Rayberdişî yê  Merkezî ra zî ameyî tasdîqkerdene. Na çarçeweye de bi rayberîya HDK,KCD, û HDP'yî Amed, Wan, Mêrdîn, Êlih, Edene, Stenbol û Îzmîr de çalakîyî bêrê kerdene.

Plansazîya çalakîyanê ke do heta 19'ê Teşrîna Verêne bêrê kerdene wina yê: "Çerçeweya nê qeraran de çalakîyê Nobete yê Amed, Wan, Mêrdînî de taxanê înan de zî bêrê viraştene, standê îmza bêrê ronayene û kampanyaya îmza bêra kerdene. Rayberîya HDK, HDP'yî çalakîyî û aktîvîteyî ke reaksîyonê komelî bêrê pîlkerdene, do bêrê viraştene

16'ê Teşrîna Verêne: Bûrsa, Yalova, Kocaelî, Tekîrdag, Balikesîr, Çanakkale, Edîrne, Sakarya û pêro qezayanê bînan de qezaya Esenyurtî ya Stanbolî de çalakîye do bêra viraştene. Elîh û Sêrt de pê beşdarîya şarê qezayanê înan zî şar do kombîyayîşan de bêro têhet.

17'ê Teşrîna Verêne: Wan de pê beşdarîya qezayanê Wanî u şaristananê dorme ê Wanî şar do kom bibo. Şarê Mugla, Manîsa, Aydin, Denîzlî, Antalya, qezayanê înan ra û Îzmîrî ra Îzmîr de kombîyayîşê şarî do bibo.

18'ê Teşrîna Verêne: Kombîyayîşê pîlî yê ê pê beşdarîya şaranê Mêrdîn, Şirnex, û Riha û qezayanê înan do merkezê Mêrdinî de bibo. Pê beşdarîya şaranê Edene, Mersîn, Osmanîye, Hatayî Edene de kombîyayîşêko pîl bêro kerdene.

19'ê Teşrîna Verêne: Pê beşdarîya şaran ê Enqere, Eskîşehîr, Kayserî, Kirşehîr û Konya Enqere de kombîyayîşê şarî do bibo. A roje saete 13.00 de do eşkerayîyê çapemenîye do her ca de bêrê dayenê."