Hemserekê bajaran ê HDPyî semedê erjnayîşê xebatanê vîjnayîşî kom bîyî. Seba ke program zaf sixletîyo, serkêşîya hermserekan Pervîne Buldan û Mîthat Sancarî de kombîyayîş online ame kerdene.

Sancarî bêxemîya îqtîdarî ya wextê erdlerzî vist vîrî û vat:  ''Dejê ma giran o.  Girdîya paştîdayîşî biney dejê ma kerd şenik, birînî piştî û ma rê bîye hêvî. Îqtîdarî hem tedbîrî nêgirewtî hem zî badê erdlerzî wezîfeyê xo nêard ca û şar binê rijnayîşî de verda. Coka dejo wina gird vejîya werte. No îqtîdar çimeyanê welatî semedê şer û paştgêranê xo xerc keno. Şar mecbûrê nê zilmî nîyo. Yewna sîstem mumkun o. Ma semedê destpêkerdişê sîstemê neweyî kewtî rayîr. 8ê Adare û Newroze binê şînê erdlerzî de ameyî pîrozkerdene û mesajê xoverdayîşî ameyî dayene. Verê ma de 1ê Gulane est o û dima ra 14ê gulane de do sandiqê vîjnayîşî bêrê ronayene. Ma pîya bi îtîfaqanê xo amadekarîya vîjnayîşî kenê. Hedefê ma yo stratejîk wardayîşê îqtîdarê qirkerî yo. Badê dewaya qefilnayîşê partîya ma, ma vatbi ma do şarê xo bê alternatîf meverdê û rayîrê hîreyînî a bikerê. Ma do binê serbanê Partîya Çep a Hewze de bikewê vîjnayîşî. Ma do bi heme hêzê xo semedê serkewtişê Partîya Çep a Hewze bigurîyê.''

Buldane zî Aşma Remezanî bimbarek kerde û vat: ''Cuya ma nika bîya di parçe, erdlerzî ra ver û erdlerzî pê. Ma dejo zaf gird ant. Nê îqtîdarî felaketa erdlerzî dahîna kerd gird. Netîceyê erdlerzî hema zî dewam kenê. Mexdûrê erdlerzî do ewro ra tepîya se bikerê. Gerek paştîdayîşê wextê erdlerzî ewro zî semedê mexdûranê erdlerzî dewam bikero. Ma sey HDPyî tim kişta şarê xo de yê. Rixmê şînê erdlerzî 8ê Adare û Newroze ameyî pîrozkerdene, no hêvî dano ma. Prosesê vîjnayîşî dest pêkeno. Ma xora eşkera kerdbi, ma sey Partîya Çep a Hewze do bikewê vîjnayîşî. Seba ke ma verî vatbi ma  namzedê xo vejenê, keyfê şarê ma amebi. Ma nê keyfî fam kenê. Rîyê erdlerzî ra şertî bedilîyayî. Ma zî qerarê xo bedilna.  Ma hêvî kenê ke no qerarê ma zî do bibo wesîleya coş û heyecanî. Xora ma nê qeraran xo ser nêgenê. Pîya bi heme dezgehanê xo verî serê ci de mişewre kenê. No qerarê ma semedê înşakerdişê cuya newî, çînkerdişê faşîzmî û şawitişê îqtîdarî muhîm o. Ma hema name eşkera nêkerd la eke xebetê vîjnayîşî dest pêbikerê ma eşkera kenê ke derheqê serekkomarîye paştî danê kamî. Hedefê ma vetişê 100 parlamenteran o. Rayîrê ma akerde yo.''