Hemserekê Pêroyî yê HDPyî Mîthat Sancarî destpêkerdişê kombîyayîşê Heyetê Mişewreyî yê partîya xo de qisey kerd. Qiseykerdişê Sancarî ra tay cayî wina yê:

''No kombîyayîş semedê ma zaf muhîm o. Ma xerîtaya rayîrê xo ya ewroyî ra tepîya bewlî kenê. Ma vizêr qerarê xo yo muhîm eşkera kerd. Badê rijîyayîşê erdlerzî ma reyna dî ke berpirsîyarîya ma ya bedilnayîşê sîstemî senî giran û muhîm a. Bado ke ma xo mîyan mişewre kerd, ma pîya bi hêzanê xo yê îtîfaqî qerar girewt ke vîjnayîş de namzed mevejê. Ma vizêr no qerarê xo da eşnawitene.  Ma tim vanê ma  qerardar ê ke berpirsîyarîya xo ya demokratîke bîyarê ca.

Vizêr Mehkemeya Qanûnê Bingeyî muracatê ma yê peydeeştişê pawitişê fekkî red kerd. Xora ma zanê no qerar yeno çi mana. Nê qerarî ra dima qederê dewa destê îqtîdarî de yo. Coka sey HDPyî dekewtişê vîjnayîşî rîsk o. Ma qerar girewt ke ma do binê serbanê Partîya Çep a Hewze  de bikewê vîjnayîşî. Ma qerardar ê ke sîstemê xirabîye biqedînê. Hêzê ma est o. Xora zafê komelî wazeno na xirabîye ra bixelisîyo.

Ma sey HDP, Partîya Çep a Hewze  û Îtîfaqê Kede û Azadîye semedê bedilnayîşê demokratîkî do berpirsîyarîya xo bîyarê ca. Gerek no îqtîdar miheqeq şiro. Komel eşkeno nê îqîtdarî bido war.  Qerarê ma eşkera û tewirê ma zelal o. Vengdayîşê ma eşkera

yo: Gerek heme hêzê demokrasîyî vera îqtîdarî bêrê têhet. Ma vanê ke; Ma do pîya ser bikewê, yewna çareyê ma çîn o.  Hêzê ma vejeno, îmkanê ma est ê. Zafê komelî paştî dano ma.''