Xebatê weçînitişanê 31ê Adare nika ra dest pêkerdî. Serra newî ra dima xebatî do manaya pratîke de zî dest pê bikerê.

Partîya Şaran a Demokratîke (HDP) bi zextanê ke nimûneyê înan çinyo kewena xebatan mîyan. 94 şaredarîyanê ci rê qeyûm ame tayînkerdene, erkê 8 şaredarîyanê ci zî dewrê amirîya îdarîye ameyî kerdene. Partî do seba pey ser girewtişê 102 şaredarîyanê xo xebatan bikero. HDP do tarîxanê mabênê 20ê Teşrîna peyêne û 5ê Kanûne de muracatanê vernamzedan bigîro û mulaqatê 20 rojî ra dima zî heme namzedanê xo eşkera bikero.    

Endama Heyetê Rayberdişî yê Merkezî yê HDPyî Zubeyde Zumrute derheqê polîtîkayanê AKPyî û zextê aye yê serê şarî de ANFyî rê qisey kerd.

'MA DO DEMOKRASÎYA CAYÎYE XURTÊR BIKERÊ'

Zumrute vat HDPyî ra tenya yew kes/e bimano zî do xebatê înan dewam bikerê û wina vat: “Ma rixmê her çîyî de hem hetê Kurdistanî de hem zî hetê Tirkîye de xurtkerdişê demokrasî xo rê esas girewto. Ma seba şaredarîyanê xo ra dûrkerdişê qeyûman xebatan kenê. Muracatî rixmê heme zextan de beyankerdişê îradeyî yê.”

'HÊRSÊ ŞARÎ DO SINDOQE DE XO RAMOJNO'

Zumrute nê pare kerdî: “Kombîyayîşanê ma yê şarî de û xebatanê fîzîbîlîteyan de ma dî ke şarê ma çiqa hemverê polîtîkayanê AKP-MHPyî de bihêrs o. Ewro şar zaf kuçeyan de nêaseno, labelê hêrsê xo zereyê xo de gênê û do sindoqe de nê hêrsî ramojnê. Çîyo ke sey HDP keweno milê ma ser ma nê bi hawayêkê rindî koordîne bikerê û organîze bikerê. No tenya weçînitişêk nêyo, bi nê ma do xeta xoverdayîşê demokrasî zî bimûnê.”

'WA FIKARÊ ŞARÊ MA ÇINÊBO'

Zumrute derheqê qeyûmanê AKPyî de zî nê vatî: “Ganî sere de bajaranê ke qeyûmî ameyê tayînkerdene înan de şarê ma hîna zaf şiro sindoqan. Hetê îdarekarîya cayîye de xora tecrubeyêk mi esto. Ma do tehrîbatanê qeyûman wedarê û şaredarîyan ancî bikerê binê xizmetê şarê xo. Na yewe ra fikarê ma û şarê ma seba 1ê Nîsane çinyo. Tenya ma şarê xo rind organîze bikerê û înan dir bikoordîne bê, çîyo muhîm no yo.”

'PÊVÎNAYÎŞÊ MA YÊ SEBA ÎTÎFAQÎ ESTÊ'

Zumrute derheqê îtîfaqanê weçînitişî de zî qisey kerd û nê vatî: “Ganî cigêrayîşê seba îtîfaq û yewîya hêzî bibê. Nika hem hetê Kurdistanî de û hem zî hetê Tirkîye de nê warî de pêvînayîşê ma estê. Kurdistan de ganî şarê Kurdî û dînamîkê bînî yê cimatkîyî bêrê thêhet û yewîya xo ya zereyî bihêz bikerê. Çunke hemverê ma de tradîsyonêkê dewlete ke bi teknîk, hêz û estîya xo serê şaran de zextan kena esta. Ganî ma hemverê nê tradîsyonî de ma yewîya hêzanê demokrasî awan bikerê.”