Wekîlanê HDP’yî derheqê  qerarê YSK’yî yo ke mazbatayanê hemşaredaranê HDP’yî yê îxrackedoxan dano namzedanê AKP’yî de vernîya YSK’yî de eşkerayîyêk daye.

Nameyê wekîlan ra wekîlê HDP’yî yê Mêrdînî Mîthat Sancarî  qisey kerd û nê pare kerdî:

‘‘Qerarê YSK’yî  ne goreyê huqûqî ne zî goreyê ehlaqî yo.  No qerar ramojneno ke Tirkîya de heq û huqûq çîn ê. Asayîşê weçînitişî çîn o.  Na zî meseleya haştiyê cimatkî ya. 5 qezayan de rîye îxreckerdişê Qanûnê Hukmê Qanûnî ra mazbatayî hemşaredaranê ma yê serkewteyan nêameyî dayenê. Nê qezayan de partîya ma  bi ferqê girdî qezenc kerdo. No îradeyê şarî rê derbe yo. Reyna ameyoxê demokrasîya Tirkîye rê derbe yo. Goreyê eşnawitşanê ma 9‘ê menge de  hetê endamanê YSK’yî ra kombîyayîşêk ame viraştene û qerarê îptalkerdişê mazbatayan û newe ra weçînitişî ser munaqaşa ameye kerdene. 10 kesê tewrê kombîyayîşî bîyê, înan ra 5 kesan newe ra weçînitiş waşto, 5 kesan zî vato wa mazbatayî bidîyê înan ke rêza dîyine de yê. La roja bîne no qerar nişka ameyo bedilnayene. 2 kesanê ke vatêne wa weçînitiş newe ra bibo, qerarê xo bedilnayo. Nê 2 endamanê YSK’yî mîyan 24 saetan de qey qerarê xo bedilnayo, ma wazenê bizanê. Ma cewabê nê  pawenê û teqîpkedoxê na babete yê. Ma do îtîraz bikerê. Na mesele de îxmal ya da qestê endamanê YSK’yî esto ganî bêro safîkerdene. Endamê YSK’yî hekîm ê coka ganî HSK naye zelal bikero. Heqê YSK’yî çîn o ke bawerîya şarî ya weçînişê demokratîkî werte ra  wedaro. Ma do bi îtîrazê halê îstîsnayî semedê qezayanê Tuşba, Çaldiran û Artemêtanî yê Wanî, qezaya Tatosî ya Erzîromî qezaya Dîgorî û beldeya Dagpinarî yê Qersî yê ke derheqê înan qerar ameyo girewtene, îptalkedişê weçînitişî biwazê.''