Vervatoxê HDP'yî Sarûhan Olûçî qerarê YSK’yî yê derheqê hemşaredaranê HDP’yî yê bi KHK’yî amebî îxrackerdene rexne kerd û vat, “Na daf a. YSK bi nê qerarî Tirkîya keweno mîyanê kaosî. No qerar komploya sîyasîye ya.”

Vervatoxê Partîya Şaran a Demokratîke (HDP) Sarûhan Olûçî, serê qerarê Heyetê Weçînayîşê Berzî (YSK) yê derheqê şaredaranê HDP’yî yê ke bi KHK’yî amebî îxrackerdene, Merkezê Pêroyî yê HDP’yî de kombîyayîşê çapemenîye viraşt. Olûçî, ard ziwan ke ê do Heyetê Rayberdişî yê Merkezî yê HDP’yî de kombîyayîşêk bivirazê û qerarê YSK’yî nê kombîyayîşî de biercnê. Olûçî vat, qerarê YSK’yî  daf a û wina dewam kerd, “No qerar verê ameyo plankerdene. Komployêka sîyasîye ya. YSK verê ma de dafe nano ro. Şima do bivajê dagerî senî dafe nanê ro? Heya. Ma bîyî şahîd ke dadgerî Tirkîya de dafe nanê ro. Qerarê YSK’yî yeno na mana. YSK eşkayêne kesê ke bi  KHK’yî ameyê îxrackerdene nêkero vernamzed. YSK yo ke derheqê her çîyo ke hewca keno, nêko de pêronameyan amade keno, derheqê na babete de pêroname nêdaya weşanayene. YSK’yî bi nê qerarî vera îradeyê şarî de derbe viraşta. “

Baglar de HDP’yî se ra 71 reyî girewtî

Olûçî bala ante serê netîceyanê weçînayîşê cayîyî û vat, “Qezaya Tûşba de HDP’î se ra 58, partîya bîne zî se ra 39 rayî girewtî.  Artemêt de HDP’î se ra 54, a partîya bîne se ra 42, Çardêran de HDP’î se ra 53 rayî girewtî. Baglar de HDP’î se ra 71 rayî girewtî, partîyanê bînan pîya se ra 25 rayî girewtî. HDP weçînayîşî de ser kewt, la YSK herinda mazbata bido partîya ke serkewta de, mazbata dano partîya ke weçînayîş vîndî kerdo.” Olûçî hetê bînî ra da zanayene ke qerarê YSK’yî keyfî yo û ê nê qerarî nas nêkeno û  wina vat, “Seba ke Tirkîya bikewo mîyanê kaosî qerarêkê winasî da.”