Vervatoxa Komîsyonê Huqûq û Heqanê Merdiman ê HDP’yî parlementera Êlihî Ayşe Acar Başarane, derheqê kovuyî ya ke Xelfetî de ameya kerdene û bi desan kesê ke ameyî destbendkerdene de eşkerayîyêka nuştekîye weşanaye.

Eşkerayîye de ame vîrardene, dewanê Xelfetî de tewr kêmî 38 kesî hetê hêzanê asayîşî ra ameyî destbendkerdene, destê înan pey ra ameyê kelepçekerdene, sey dewro mîyanên îşkencê înan rê ame kerdene û ame vatene, kerdişê ke ame kerdene nîşan danê ke peyamê vera îşkenceyî yê ke Tirkîya morê xo dayo binê ro ameyê betalkerdene. Başarane vat, “Ma dî, fotografê hemwelatijanê ke hêzanê asayîşî bi ci îşkencê kerdo, bi zanayîşî çapemenîye de ameyê weşanayene. Ma dî ke dewlete bi îşkenceyî, bi zulmî, bi şîdetî cehd kena hêzê xo bimojno hemwelatijan.”

Eşkerayîye de ame vatene, “Ma barbarîya ke Xelfetî de qewemîya nêzdî ra teqîp kenê. Seba kesanê ke tewrê nê sûcî bîyî; polîsî, tîmê taybetî, eskerî û ê yê ke ferman danê bêrê cigêrayene, ma muracatê dadgerîye kenê.”