Komîsyonê Polîtîkayanê Ziwan Kultur, Huner, Spor û Perwerdeyî yê HDPyî bi wesîleya 20ê Teşrîna Peyêne Roja Heqanê Domanan a Dinya derheqê qedexekerdişê ziwanê dayîke de dezgehanê mîyanneteweyî yê sey Komîteya Domanan a Neteweyanê Yewbîyayeyan, Meclîsê Parlementeran ê Konseya Ewropa, UNESCO û UNİCEFî mektûbe şawite.

Mektûba ke hetê berpirsîyarê komîsyonî û hetkarê hemserakanê HDPyî Salîm Kaplanî ra ame nuştene de ca dîya nînan:

''Badê Pêkerdişê Heqanê Domanan o ke hetê Neteweyanê Yewbîyayeyan 20ê Teşrîna Peyêna 1989î de ame qebulkerdene, her serre na roje sey Roja Heqanê Domanan a Dinya yena qebulkerdene. Goreyê nê pêkerdişî berpirsîyara dewletan esta ke heqanê domanan bîyarê ca. Tirkîya de bi mîlyonan domanî heqanê xo ra mehrûm ê. Madeyê 17. 29. û 30. yê Pêkerdişê Heqanê Domanan yê ke madayê tewr muhîmî yê pêkerdişî yê, yenê binpaykerdene. Tirkîya de îstîsmarê domanan, şîdet û nêzdîbîyayîşo cîya yê vera donana ê kênayan, karkerîya domanan, domanê macîrî, domanê astengdarî, domanê ke zîndanan de yê,domanê ke binê şertanê şerî û şîdetî de yê, domanê ke netîceya rewşanê sosyal û ekonomîkî kewtê rewşa xirabe, domanê ke ziwanê dayîke ra mehrum mendî û raştê polîtîkayanê asîmîlasyonî yenê estê.

Dewletê otorîterî zî tede xeylêk welatan de modelê perwerdeyê zafziwanî û diziwanî estê la Tîrkîya de bitaybetî  sere de domanê kurdan bi mîlyonan domanî nêeşkenê ziwanê dayîke de perwerde bivînê. Goreyê madeyê 42. yê  Qanûnê Bingeyênî no qetî qedexe yo. Reyna domanê ke bawerîyanê cîyayan ra yê bizor tewrê desanê dînî benê û musayîşê bawerîya xo ra mehmrum manenê. Domanî hem ziwanê dayîke ra yena dûrîfînayene  hem zî kulturê înan ra yenê raqilnayene. Tirkîya de têna serê kagitî de heqê domanan esto. Sere de heqê perwerde, cuye û kulturî heqê tewr muhîmî yê domanan binê tehdît de yê. Bi wesîleya na roje ma veng danê Komîteya Domanan a Neteweyanê Yewbîyayeyan ke wezîfeyêko sey çimdarî bigîro  û şiro Tirkîya ser ke pêkerdiş pratîk de bêro caardene û domanî bikeşkê heqanê xo bişuxulnê.''