Rêxistinanê HDPyî yê Amed û Îstanbulî Qirkerdişê Zaxoyî şermezar kerd û îfade kerd ke mesuldarê nê qirkerdişî qetî do hesab bidê.

Rêxistina HDPyî ya Îstanbulî verê bînaya xo de binê ablûqaya polîsan de bi eşkerayîyêke qirkerdiş protesto kerd. Eşkerayîye de sloganê sey 'Şehîd nêmirenî', 'kiştoxî do hesab bidê' ameyî vatene.

Hemsereka HDPyî ya Îstanbulî Îlknure Bîrol eşkerayîye wende mesuldarê Qirkerdişê Zaxoyî mesuldarê Qirkerdişanê Zîlane, Dêrsim, Roboskî, Şingal, Qamişloyî yo. Bîrole vist vîrî ke îqtîdarê AKP-MHPyî kiştoxê kurdan o. Bîrole vat: ''Ma venga hêzanê muxalefetê komelkî, pêro partîyanê sîyasîyan vera şerî vengê xo berz bikerê.''

Hemserekê HDPyî yê Îstanbulî Ferhat Encuyî zî ard ziwan ke ganî meseleyî pê dîyalogan bêrê çareserkerdene û vat: ''Pê kiştiş û hêrişan çîyêk nêkeweno destî. Ma do heta peynî peyê hesabê nê qirkerdişî de bibê.''

Rêxistina HDPyî ya Amedî parka Koşuyoluyî ya qezaya Rêzanî ya Amedî de eşkerayîyêke daye. Wekîlê HDPyî Dêrsime Dag û Remzîye Tosun, aktîvîstê TJA, DBP, temsîlkarê OHDyî û xeylêk kesî tewrê eşkerayîye bîyî.

Hemsereka HDPyî ya Amedî Gulîstane Atasoy verî qisey kerd û pare kerd ke Tirkîya wazena serê qirkerdişî bigêra. Dêrsime Dag da zanayene ke dewleta tirke Kurdîstan de polîtîkayanê qirkerdişî ana ca û vat ke ê do hesabê qirkerdişan pers bikerê.

Polîsan xîret kerd ke qiseykerdişê Dêrsime Dag asteng bikerê. Polîsan barîkatî nayî ro û girse girewt binê ablûqa. La girseyî bi sloganan tewirê xo mojna. Polîsan nêverda ke çapemenîye dîmenan bigêra.

Rixmê astengîyan zî eşkerayîye ameye wendene.