Roja 27ine ya grevê vêşanîye ya Leyla Guvene de, çalakîyêka grevê vêşanîye zî meclîsî de amî destpêkerdene. Parlamenterê HDPyî seba paştîdayîşî kewtî grevê vêşanîye yê 2 rojan.

Grevê veşanîye yê meclîsî de hemsereka pêroyîye ya HDPyî Pervîn Buldane, hemserekê KCDyî Berdan Ozturk, vervatoxa Meclîsê Cinîyan ê HDPyî Dîlan Dîrayet Taşdemîre, serekwekîlê HDPyî yê meclîsî Mîthat Sancar û parlamenterî Kemal Bulbul, Şevîn Coşkun, Serpîl Kemalbay, Habîp Eksîk, Zuleyha Gulum û Erdal Aydemîr ca girewt.

“CAYO KE TEWR ZAF GANÎ TECRÎDÊ SERÊ OCALANÎ BÊRO QISEYKERDENE MECLÎS O”

Çalakwana grevî hemsereka pêroyîye ya HDPyî Pervîn Buldane vat: “Ewro serê sibayî ra tepîya ma grevê xo yê vêşanîye ke do 2 rojan dewam bikero binê serbanê meclîsî de da destpêkerdene. Seke yeno zanayene parlamentera ma ya Colemêrgî birêze Leyla Guvene nê 27 rojî yê ke seba wedartişê tecrîdê serê birêz Ocalanî grevê vêşanîye de ya. Ma na çalakî seba paştîdayîşê aye û waştişê ci  virazenê.”

Dewamê qiseykerdişê xo de Buldane wina vat: “No problem tenya yê Guvene nêyo. Heta problemê Kurdan hal nêbê, problemê Tirkîye zî hal nêbenê. Ma seba paştîdayîşê Guvene meclîsî de nê grevî kenê. 3 serrî yê ke serê birêz Ocalanî de tecrîdo girankerde esto. Ganî no problem meclîsî de bêro halkerdene, goş bidîyo na çalakî. Wedartişê tecrîdî seba ameyoxê Tirkîye, aşitî û demokrasîya ci muhîm o.”

Buldane derheqê persêk sey tirêm seba grevê vêşanîye ya Leyla Guvene Wezaretê Edaletî înan dir qisey kerdo yan nê rê wina cewab da: “Ma qisey nêkerd, wa ê ma dir qisey bikerê. Leyla Guvene parlamentera dewrê 27. ya tepiştî ya teke ya. Ewro bedenê xo wucûdê xo dayo vêşanîye ver. Ganî ê ma ra bipersê û na babete bigîrê rojdem.”